Den su afan pa laga un parti di pueblo lubida di e castigo y maltrato cu e la ricibi durante e ultimo 7 añanan, dos siman pasa gobierno a cuminsa reparti ‘Regalonan’. Segun gobierno, esakinan ta e frutanan di ‘Bon Trabou’. Un anuncio hopi straño, pasobra keto bay e situacion economico/financiero ta hopi malo y e debe nacional ta sigui crece, a pesar cu diferente medida severo a wordo tuma. Gobierno a cuminsa reparti ‘Regalonan’, atrobe prome cu eleccion, mientras cu ningun caminda den e presupuesto 2017 tin fondonan reserva pa esakinan. Banda di esaki, gobierno no a splica pueblo cu den esencia, e ‘Regalonan’ ta un rebaho camufla di e medidanan cu e la pone riba lomba di pueblo. Pues e dolor financiero, solamente lo wordo alivia un tiki y cu e ta temporal. Tampoco gobierno tabata honesto y sincero pa splica cu e ‘Regalonan’, lo aumenta e debe biyonario nacional, subi e ‘cost of doing business’, aumenta e cifra di desempleo y cu despues di eleccion, mas medida mester wordo tuma pa paga pa nan. Pero manera gobierno a haci un parti di pueblo aki dependiente, e lo no realisa cu e ‘Regalonan’ tambe lo contribui na e destruccion structural di nos economia. 

Den e show ‘Progreso Comparti’, gobierno a anuncia cu e pensioen lo subi cu 2.3% pa prome di januari. Pues e pensionado lo haya mas o menos 50 florin extra, di cual ainda mester kita ‘premies’ y impuesto di esaki. E ultimo cifranan di e oficina Central di Estadistica (CBS) ta mustra cu e grupo di pensionado, ta wordo forma pa alrededor di 21000 hende. Pues e ‘Regalo’ lo costa  bruto mensual 1.050.000 florin y 12.6 miyon florin anual. 

Te cu algun luna atras, casi tur dia politiconan den oposicion tabata mustra riba e biahenan global di e prome minister y cuanto esakinan tabata costa pueblo. Pero diripiente, nan a stop di toca e tema aki. Wel e argumento aki, tabata un bon punto di salida pa e investigacion comparativo aki. Den e presupuesto 2017, tin presupuesta 1.7 miyon florin pa biahenan (di cual 551.500 florin ta bay pa e oficina di e prome minister), 14.1 miyon florin pa ‘deskundig advies’ (di cual 989.300 florin ta bay pa e oficina di e prome minister) y 4.7 miyon florin pa ‘overige kosten’ (di cual 2.1 miyon florin ta bay pa e oficina di e prome minister). Pues un total di 20.5 miyon florin (di cual 3.6 miyon florin ta bay pa e oficina di e prome minister). 

Cu e investigacion comparativo aki, pueblo por haya un miho bista riba kende ta esunnan cu realmente ta beneficia di e ‘Progreso Comparti’ y con grandi e manipulacion ta. Alabes e investigacion ta mustra con facil e ta pa campaña cu placa di pueblo y crea un imagen di ‘Sinterklaas’. Con facil e ta, pa laga un parti di pueblo kere cu e tambe lo haya ‘algo’ di e ‘Progreso’, mientras cu en realidad e lo haya mas debe, medida y miseria. Trikinan y manipulacionnan bieu, pa mantene un parti di pueblo ciego, dependiente y pober, mientras cu e grupito privilegia lo sigui ‘biba lekker’. Ki dia e adultonan di e parti di pueblo aki, lo ripara cu ‘Sinterklaas’ no ta existi y esun den gobierno a reparti 12.6 miyon florin pa tapa cu e la regala su gobierno 20.5 miyon florin?


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co