STA CRUZ – Durante ultimo lunanan miembronan di fraccion di MEP varios biaha a denuncia e problemanan di e dump na Parkietenbos. Por corda cu Xiomara Ruiz-Maduro y Dangui Oduber a bai subi e seronan di dump pa filma eynan pa asina henter Aruba por mira con e condicionnan eynan ta. Por corda con lider di MEP Evelyn Wever-Croes a bai filma dilanti dump pa denuncia e molester di holor y huma, y ela; wordo cori pa un bewaker, siendo cu ta riba tereno publico e tabata.
Por corda Glenbert Croes ta denuncia cu e ta buscando un reunion cu Serlimar pa basta tempo pero directiva di Serlimar no kier duna e fraccion geel un reunion. Glenbert tambe na mas cu un ocasion a bisa cu gobierno mester respeta derecho di existencia di Serlimar.

Durante un entrevista a puntra lider di MEP kiko ta locual cu MEP ta spera pa sali di tur e discusion aki.

“Nos tin varios punto di preocupacion ora ta trata e tema di dump.
Pa prome nos ta exigi cu mester stop e kimamento na dump pa alivia e molester na e habitantenan. Hopi hende a bira malo door di e huma y e holor. Muska ta un molester constante. Na 2009 gobierno di MEP a paga e candela, pero debi na negligencia di gobierno di AVP e candela a bolbe cuminsa. Nos mester percura pa paga e candela y baha e sero di sushi eynan. Pasobra esey so por trese alivio pa e bario. Pesey dia Mike Eman a anuncia cu ta bai sera e dump, mi tabata optimista, pero awor mi a realisa cu esey tabata un promesa falso, pasobra e no tin un plan unda otro ta bai tira sushi pasobra no tin ningun sistema cla pa procesa tur sushi di Aruba despues di 1 januari 2017.
Ademas, sera e dump no ta suficiente, pasobra debi na negligencia di e gobierno actual, e seronan na dump ta den asina mal estado cu nan mes ta pega candela. Mester un proceso intenso di limpiesa eynan. Y mester atende ainda cu e molester cu Ecogas ta causa e habitantenan. E ora numa e ta trese alivio pa e habitantenan.

Pa di dos. Si e dump na parkietenbos wordo sera, kiko ta bai pasa cu Serlimar. Serlimar awor ta encarga cu recogemento di sushi y maneha e dump na parkietenbos. Si sera Serlimar ken ta bai hasi e trabounan aki. E trahadornan ta den inseguridad y esey no ta husto.

Pa nos preocupacionnan wordo trankilisa, nos ta exigi un plan kiko lo bai hasi dentro di 3 siman ora e dump sera, kiko ta pasa cu trahadornan y con ta bai procesa e sushi di Parkietenbos. E trahadornan ta welgando cu nan derecho, pasobra no ta forma pa hunga cu nan pan. Tur hende sa cu Mike Eman su unico interes ta complase esnan serca di dje. Talves cu Ecogas por ta parti di e solucion di procesamento di sushi pa Aruba, pero Ecogas a informa nos cu nan no por procesa tur sushi di Aruba awor aki. Mas importante ta cu ta nos deber pa protehe nos compania nacional, Serlimar” lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co