Pueblo kier pa caba cu stempelparlement. 

ORANJESTAD -- Durante reunion den Parlamento diamars ultimo a wordo trata e presupuesto pa 2017 di e fondo di turismo TPEF. Remarcable ta cu gobierno a bin pidi Parlamento un presupuesto di 3.5 miyon florin, pero ainda no a entrega relato financiero di e ultimo 5 anjanan den cual a haya mas di 20 miyon florin. 

Lider di MEP Evelyn Wever-Croes un biaha mas a cuestiona esaki severamente.  “Un Parlamento cu ta respeta su mes, no ta aproba mas placa pa un fondo asina sin cu e minister duna cuenta di e anjanan anterior. E fondo a haya durante e temporada di 2011 te cu awor mas di 20 miyon florin, pero no ta cumpli cu e obligacion di duna cuenta. Pa colmo anja pasa ainda e ex minister Otmar Oduber a informa Parlamento cu nan a pidi oficinanan di accountant pa traha e cuentanan anual, pero nan no ta cla ainda, y awe e minister nobo di turismo a bisa cu no ta berdad. 

Dicon subsidio di otro Fundacionnan si ta wordo corta si nan no duna cuenta?
Si tabata otro fundacionnan no entrega nan cuenta anual, mesora Gobierno ta corta den nan subsidio. Wak cuanto problema gobierno a hinca SKOA aden pa motibo cu nan no tabata entrega relatonan financiero y miles di mucha di 6 pa 12 anja a wordo perhudica. Pero e fondo aki si por haya 3.5 miyon mas sin duna cuenta riba anjanan anterior! Esey ta inaceptable pa nos. Locual mas mi a lamenta ta cu pa parlamentarionan di AVP esaki no ta importante. Nan a djis elogia e minister pero no a exigi pa gobierno cumpli cu su obligacionnan financiero. Ta esaki ta locual a hinca nos pais den problema tanto tempo, ta esaki a pone cu gobierno a redobla nos debe, y awor ta causa cu nos a perde nos automomia.

Mester cambia sistema di Parlamento, y caba cu stempelparlement
Nos mester cambia e sistema di Parlamento pa caba cu e stempelparlement. Pa prome mester percura pa e parlamentario tin autoridad real pa e tin algo di bisa e minister. Mester cambia e sistema cu esnan cu a haya e mayoria di votos ta den gobierno, y esnan cu hopi menos voto ta den parlamento. Pesey un parlamentario awor di AVP nunca por dicidi pa su mes, e no por bisa un minister nada. Den e caso aki, parlamentarionan di AVP mester a exigi pa haya relatonan financiero PROME cu duna mas placa.

Bin cu eleccion separa pa Parlamento
Mester separa eleccion di parlamento cu esun di gobierno, pa asina esnan cu wordo eligi como parlamentario realmente fungi como parlamentario. Asina nan tin mas autoridad pa controla e gobierno. Nos mester cambia nos leynan y kibra cu tradicion. Ta solamente cu e cambionan asina, nos lo soluciona e problema. Nos cuidadanonan kier por biba trankil, sabiendo cu tin un Parlamento cu realmente ta controla gobierno, y no ta fungi simplemente como un stempelparlement. Nos ta cla pa e cambio aki, pasobra e pueblo di Aruba merese mihor” segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co