ORANJESTAD- Minister di Relacionnan Exterior Bert Koenders ta na Aruba unda el a reuni cu e tres Minister Presidentnan di Reino, Koeiman di Corsou, Marlin di Sint Maarten y Eman di Aruba. Tabata un reunion cu a dura casi henter e dia unda varios topico a haya atencion y tambe unda palabracionnan a wordo haci. Den oranan di atardi e tres MPnan y Minister Koenders a tene un conferencia di prensa pa informa pueblo kico a wordo discuti.

Den un entrevista cu a sigui Minister Koenders a bisa cu durante e ultimo dos aña y mey e tabatin hopi encuentro cu Prome Minister Eman y nan semper tabata hopi positivo. "Nos a traha hopi hunto pa fortifica e perfil di Reino den mundo. Hunto nos a echt traha duro y estrecho den e campaña pa logra e asiento den e Conseho di Seguridad di Nacionnan Uni. Esaki tabata algo importante, no solamente pasobra ta trata di e Conseho di Seguridad, pero sigur pasobra esaki ta un branding pa Aruba y e bentahanan economico pa e isla. Hende sa awor unda Aruba ta situa y hende sa tambe cu Aruba ta wordo representa den e Conseho di Seguridad di Nacionnan Uni." Koenders a bisa cu ora ta trata di e temanan importante di e tempo aki, manera energia, transicion y henter e asunto di estadonan isleño cu tin hopi problema pa haya fondo, pa haya credito, pero dor di un campaña fuerte cu e hunto cu Eman a hiba pa logra e asiento, Koenders ta convenci cu Aruba ta riba mapa mundial den forma skerpi. "Esaki sin duda ta bon pa e bentahanan economico y politico."

Koenders a enfatisa cu actualmente mundo a bira un luga peligroso y instabil. "Pero mi kier pone enfasis tambe cu nos, tanto Hulanda como Aruba, tin hopi oportunidad economico awor, sigur den Latino-America. Pero, nos ta confronta tambe peligernan, manera migracion, droga y instabilidad di paisnan cu ta rondona nos, na cierto haltura un pais manera Venezuela. Bon kier tin influencia riba paisnan asina y bo kier tambe pa resto di mundo sa cu abo ta esun cu tin e influencia ey. Esey ta nifica cu e tema 'Paz y Siguridad' di tur e problemanan cu tin, bo tin mas grip riba nan.  Esey ta loke nos ta bay enfoca riba dje cu nos asiento den e Conseho di Seguridad."

Koenders no ta kere cu introduccion di visa lo frena e migracion for di Venezuela. E ta pensa cu tin varios otro posibilidad pa para e migracion aki. "Tin hopi otro posibilidad pa controla ken ta drenta y sali di bo pais. E por ta e control riba bo aeropuerto, por haci uzo di un sistema di pre-clearance, tambe por haci uzo di e sistema di ESTA unda via internet e persona ta indica di kier biaha pa Aruba of Hulanda y asina por haci checknan adelanta. Bo no mester kita ningun posibilidad. Importante ta e siguridad di nos ciudadanonan." 

Expresionnan haci den e articulo aki no necesariamente ta refleha opinion di ArenaPoliti.co