Conseheronan di Mike na Hulanda ta duna MEP razon 

Siman pasa nos a publica un articulo na Hulandes, Geef Eman een baan in Den Haag, den cual nos a mustra con Minister Eman ta presta su mes pa haci trabou pa Reino Hulandes na Nacionnan Uni siendo cu Aruba mes e ta laga sin guia alguno na man di criminalidad creciente, problema financiero, problema social y rancamento di cabey entre ministernan di su Gabinete. Den e articulo nos a indica cu Hulanda mester para responsabel pa e danio cu e ausencia di nos Minister President ta ocaciona na nos Pais y nos a pidi nan pa haci Aruba un fabor door di duna Eman un trabou na Den Haag. E articulo a yega su destino den e kringnan di Politiek Den Haag y e feedback ta pa Eman bay busca trabou otro caminda ya cu na Hulanda nan no mester di dje. Ta bisto cu Hulanda ta usa Eman sin cu esaki ta trece beneficio alguno pa Aruba. Y no ta solamente nos ta yega na e conlucion aki, hasta conseheronan di Mike na Hulanda ta duna MEP razon cu Eman ta laga Hulanda use sin ningun beneficio pa Aruba.

Porta ta sera pa Eman na Den Haag
Cu tanto propaganda cu Eman ta haci pa Reino Hulandes, lesa Hulanda, por yega na e stul den e Conseho di Seguridad di Nacionnan Uni, lo bo a spera cu Politiek Den Haag lo a saca un man tambe pa yuda Aruba cu e problemanan cu Eman a hinca nos Pais aden. Pero contario na tur e propaganda cu Eman kier bende na Pueblo di un bon relacion cu Hulanda, ora di pidi yudansa na Hulanda pa Aruba, e porta ta sera pa Eman na Den Haag. Y esaki ta e opinion cu Eman su conseheronan na Hulanda sr. Laurens Jan Brinkhorst y Hans Hillen mes ta confirma den nan articulo cu a keda recientemente publica den Financieel Dagblad na Hulanda. Nan ta bisa cu asina cu desvia di e interes di Hulanda, hasta Eman mes cu ta haci trabou pa nan ta haya e porta di Den Haag sera den su nanishi. Awor si ta asina e trato ta, pakiko Eman ta keda gasta tempo, placa y sacrifica bienestar di nos Pueblo si e sa cu Den Haag su porta ta sera pe? Ta pa cual beneficio personal Eman ta haci e trabou di loopjongen pa Hulanda riba custiya di Aruba? Ta kiko ta stroba Eman di negosha na bienestar di Aruba?

Excusa pa no asumi e responsabilidad di goberna
E ta bisto cu Eman ta usa e trabou di loopjongen pa Hulanda como e excusa ideal pa asina no asumi e responsabilidad di un Minister Presidente cu mester goberna su Pais. Su ausencia ta trece gasto y inseguridad cune pa nos Pueblo. Decicionnan no ta wordo tuma y esaki ta trece desconfiansa cune cu hasta ta perhudica nos Pais internacionalmente. Ta bisto tambe cu Eman no ta interesa den bienestar di nos Pueblo, sino e no lo a haci trabou di loopjongen sin cu Aruba ta sali beneficia.

Haci trabou na beneficio di Aruba
Otro lo tabata si Eman a hinca tempo y esfuerso como Minister Presidente di Aruba pa guia nos Pais, trece stabilidad financiero por medio di un bon gobernacion y usa su trabounan pa Reino como base pa Hulanda asumi su responsabilidadnan cu largo tempo nan a core pe. Pero lamentablemente Eman ta laga Hulanda use sin cu esaki ta trece beneficio pa Aruba.


15 mei 2016

Expresionnan haci den e articulo aki no necesariamente ta refleha opinion di ArenaPoliti.co