For di tur expresion y opinion di oposicion (MEP y PDR) por conclui cu e ta na fabor di e forma cu CFT kier reorganisa finansa publico. Oposicion ta di acuerdo tambe cu e consecuencianan di e forma di traha di CFT: stagna inversion den nos economia, corta gasto di forma cu ta crea desempleo pa hopi tempo, stroba crecemento economico y ignora desaroyo general di nos pais. E unico cos cu CFT ta interesa aden ta pa drecha e cifranan di finansa publico mas lihe posibel. E consecuencia di esaki pa resto di pais no ta interesa nan. Oposicion ta di acuerdo cu CFT, e forma di maneha y e consecuencianan economico y social!

GRADUAL
E punto di bista di AVP den y pafo di parlamento ta cu un reforma gradual di finansa publico, hunto cu e reforma y renobacion di economia, tin hopi mas bentaha riba tereno financiero, economico, laboral, social y di stabilidad di pais. Mas y mas experto rond di mundo ta di acuerdo cu esey. E " costo di e austerisacion pa comunidad" den bista di expertonan ta mucho mas grandi cu e costo financiero. E forma tradicional cu CFT ta traha, a demostra di no ta duna resultado pa pueblo. Al contrario. E ta contra-productivo! Hulanda ta un bon ehempel di kico e maneho estilo CFT a haci cu e pais. Un tempo Hulanda tabata un pais cu un economia cu ta crece, un mercado laboral vibrante, forsa di compra halto, servicionan social excelente y stabilidad grandi. Awe, riba tur e areanan aki Hulanda lamentabelmente ta sigui bay atras. Nos amigo principal den mundo ta den e caida serio aki. E maneho cu a hiba a resulta den e "cacho cu ta purba gara su propio rabo". E maneho nunca ta logra su meta! Pasobra e maneho mes ta destrui e capacidad pa yega e meta. Of wak e ehempel di Corsow y Sint Maarten desde cu CFT ta casi 'maneha' finansa di e paisnan ruman aki. Economia a stagna of ta crece mucho poco. Desempleo a keda halto. Inversionnan a keda atras.

CFT
Rene Herde': "AVP ta scohe pa un desaroyo cu ta haci uzo di y continua riba loke nos a logra den e cinco aña cu a pasa: e crecemento economico, e creasion di trabou, e mehoracion di forsa di compra, e inversionnan di gobierno y di sector priva. Pa falta di interes real den nos pais y pa oportunismo misquino, oposicion (MEP y PDR) ta sigui boga pa e (mal)ehempel di CFT y tur e desgracia cu e lo causa nos pais. Lo ta bon pa oposicion scucha e gritonan na Hulanda, Europa, den IMF y Banco Mundial pa mas inversion y pa un proceso di reforma gradual di finansa publico, anto preveni di tira Aruba bek den e abismo cu e tabata aden cinco aña pasa. Pasobra ta esey ta loke e maneho di CFT lo causa. E herencia di decadencia fisico y social, desempleo halto, perdidad di forsa di compra y falta di perspectiva manera MEP a laga Aruba aden na 2009, no ta loke Aruba kier bolbe na dje. Ta dilanti nos mester bay. No atras!"

Expresionnan haci den e articulo aki no necesariamente ta refleha opinion di ArenaPoliti.co