Desde 1 December 2014, un di e tanto medidanan cu a wordo implementa e asina yama Health Tax of BAZV.  Su entrada a causa basta desacuerdo y tambe bastante confusion serca e consumidor principalmente e comerciante y e propio oficina di Impuesto. Nada contra e oficina di Impuesto pero, no mucho informacion correcto a wordo distribui na e cuidadano.

A wordo bisa cu e porcentahe aki lo genera un suma di Awg. 70 miyon pa anja y gobierno lo mester pone Awg. 20 miyon pa cubri debenan di AZV. Nunca e fondo aki no a wordo maneha corectamente y semper gobierno mester a hinca Awg. 90 miyon cu ta placa di pueblo den e pot di AZV. BAZV no tin un aangifte propio y mester pone cobranza hunto cu BBO riba e aangifte. Supuestamente e anja benidero tur cobranza locual ta trata loonbelasting, winstbelasting y BBO/BAVZ lo bira digital y cu supuestamente lo bai tin mas control di entrada di cada negoshi. Pero nos problema ta awor, con e cobranza di e aangiftenan aki por wordo controla? Dicon warda pa asina tin consecuencia riba e comerciante cu a wordo mal informa?

Anja pasa a wordo bisa cu tur hende asta e turista lo contribui cu e BAZV, pero recientemente ta wordo bisa cu ta comerciante so lo mester carga cu e peso di e 1%. Unda e respet pa e comerciantenan ta? Pakiko tanto peso riba e pober cuidadano y e comerciante? Asinaki e gobierno actual a promove durante campanja pa cuidadano inverti den e economia?

Un di e tantisimo pregunta ta, si AZV mester genera 90 miyon y solamente 70 miyon ta wordo genera den kiko e 20 miyon aki ta wordo cobra y bou ki sorto di belasting, pa cuanto tempo e porcentahe aki lo mester genera e supuesto suma aki. Despues di a genera e suma e 1% lo e wordo remove of kita, e lo keda e mesun 1% of lo aumenta di porcentahe? Dicon no aumenta e prima di AZV directamente, pa no aumenta BBO a disidi di bini cu BAZV? Con ami como cuidadano mester compronde e extra fondo aki crea pa gobierno?

Sinembargo si gobierno a maneha e finanzas di e Pais mas na serio, awe nos no ta sinti e ola di efectonan. Mester corda cu diferente instancia manera Cft, S&P, Fitch a indica cu mester bini cu sancion di medida  pa trece sanacion financiero. Ja pueblo ta carga cu diferente sancion caba manera un costo di bida rigorosamente halto, aumento den cobranza di utilidad, cortamento den ensenanza y aumento di SKOA pa cu mayornan cu tin yiunan na scolnan catolico, cortamento den esnan disabilita y nos grandinan su pension y mucho mas.  Cuanto mas e pueblo mester carga y no ta haya nada bek di parti di gobierno sin papia di e azeta cu a baha na 45 USD pa bari y cu nos como cuidadano no ta sinti efecto den prijs di utilidad, ni comestible y ni boternan di gas pa cushina cune manera nos hermana isla Corsow.

Nos di PDR su posibel solucion ta simpel manera, dunando pueblo informacion corecto, stimula e economia den forma simpel y maneha e finanzas corectamente ja asina por tin confianza atrobe den nos politiconan y e trabow cu ta wordo haci. Pasobra pueblo ja no sa mas kiko lo bai pasa y tampoco por carga cu consecuencianan financiero grandi.

Expresionnan haci den e articulo aki no necesariamente ta refleha opinion di ArenaPoliti.co