Awe ta un dia grandi y historico pa Aruba, ya cu hopi orguyo nos ta recorda cu 44 aña pasa partido MEP a ser funda pa awe den feliz memoria Betico Croes. E fundacion a tuma lugar dia 9 di februari 1971 na cas di Betico Croes, esta Cumana 84. Tabata presente mas o menos 600 lider di bario for di tur parti di Aruba. Durante e reunion aki a scoge un nomber entre e multitud presente y esaki a bira Movimiento Electoral di Pueblo (MEP). E ratificacion, esta e fundacion oficial di MEP tabata durante un Congreso teni riba e diadomingo siguiente 14 di februari den teatro Rialto na Playa. Durante e congreso aki a sosode algo unico den historia politico di Aruba, ora cu e partidonan UNA y PIA a uni nan mes cu partido MEP. Como maestro di ceremonia a actua riba e diadomingo ey sr. Cay Odor.  E promer directiva di MEP tabata consisti di e siguiente personanan: Betico Croes, Lider y Presidente di MEP y e otro miembronan tabata Efraim de Kort, Daniel Leo, Jossy Croes, Sixto Feliciano, Watty Vos y Cezare Terzano. E personanan di parti di UNA tabata: Frans Figaroa, Dodo Figaroa, Poy Werleman y Tommy Leest. Tambe tabata presente Roland Lacle, Rafael Wever y Delwyn Gomez.


Union di henter pueblo
Cu e fundacion aki tambe e panorama politico na Aruba a cambia completamente, ya cu MEP a pone un movimiento den marcha cu a percura pa caba cu tur descriminacion y segregacion cu den e epoca ey tabata existi riba e isla aki. Desde principio  partido MEP a pone su dilanti e ideologia social-democrata, nos structura estatal y union di henter e pueblo Arubano, sin distincion di rasa, color, districto, religion, status social etc. Den apenas dos luna di tempo e partido aki a logra obtene un tercera parti di e electorado Arubano, esta 7 asiento for di 21. Desde e tempo ey MEP a crece drasticamente, tanto den voto como den asiento y a bira un partido grandi, prestigioso y respeta den comunidad. Sin duda algun cu MEP a bira e vehiculo principal di nos Libertador Betico Croes den su lucha pa nos Status Aparte. E lucha aki no tabata facil y ta solamente a base di sanger, sodor y lagrima e Status Aparte a wordo realisa dia 1 di januari 1986.

MEP y Status Aparte
MEP ta un partido cu desde su fundacion apenas a conoce tres lider, esta Betico Croes (1971-1985), nos lider honorario Nelson Oduber (1986-2011) y desde 2011 nos lider actual sra. Evelyn Wever-Croes. MEP ta un partido di cual despues di morto di su inmortal lider Betico Croes a wordo bisa na Hulanda cu “Betico dood, MEP dood”. Sinembargo te cu awe MEP ta mas bibo cu nunca y semper para cla pa sali na vanguardia di e pueblo Arubano. MEP ta e partido cu a percura pa nos simbolonan di union y libertad, esta nos himno y bandera, nos moneda, nos ortografia, nos propio constitucion, Gobierno, Parlamento, nos propio Gobernador, Banco Central etc. Den henter e lucha pa Status Aparte a resalta e accionnan di augustus 1977, ya cu tabata danki na e accionnan aki cu Aruba a wordo scucha dor di Hulanda. Finalmente e deseo di Aruba a wordo concretisa durante e Conferencia di Mesa Rondo na 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda.

Schrapmento di fecha 1996
Y ta cu honor dia 13 di juli 1990 sr. Nelson Oduber a percura pa schrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel. Hecho ta cu ta danki na e logro di Status Aparte na 1986 cu MEP a realisa, Aruba a haya e instrumentonan economico pa por a sigui desaroya e pais aki. Awe lider di MEP, sra. Evelyn Wever-Croes ta manda un danki special na tur esnan cu a funda partido MEP y cu a yega forma parti di e lista aki y en especial na nos lider inmortal Betico Croes y nos lider honorario Nelson Oduber. Alavez un felicitacion na tur candidato, directivanan di districtonan, Forza Femenina Grace, e hala hubenil YEGA, militantenan y tur e votadornan pa cu e 44 aña di existencia di nos partido. MEP ta un partido grandi y den futuro lo sigui haci cosnan grandi pa e pais aki!

Expresionnan haci den e articulo aki no necesariamente ta refleha opinion di ArenaPoliti.co