Diaranson mainta Minister di Finanzas, Angel Bermudez a sinta cu miembronan di comision financiero y comision di ‘landsuitgave’ di nos parlamento pa asina duna un presentacion riba presupuesto 2015 .

Minister Bermudez a comparti algun cifra clave como tambe e tareanan principal di e presupuesto 2015 pa tur parlamentario y na mes momento a informa cu for di dialuna siman pasa esaki ta na Raad van Advies, por lo tanto e ta spera cu den 3 siman e lo ricibi e recomendacionnan y consehonan di RvA.

E reunion tabata uno basta largo cu hopi pregunta di parti e parlamentarionan y hopi al caso manera e mandatario di finanzas a informa. Minister Bermudez a papia riba e consehonan relaciona cu e presupuesto 2015 cu College Financieel Toezicht (Cft) a publica recientemente, no obstante a indica tambe cu e 24 medidanan aki tabata conoci caba den Staten pues nan a wordo trata aña pasa.

Na mes momento Minister di Finanzas a splica un biaha mas cu e ta dificil pa elabora extensamente tocante e reaccion aki di Cft mientras cu e no wordo trata den Staten, “Tanten e concepto no yega Staten den un manera mas formalisa mi no por discuti riba loke Cft a comenta internamente”.

E mandatario a indica cu e presupuesto 2015 tambe ta cumpli cu e “Balans Budget Agreement”, caminda cu ta establece un ‘plafond’ riba gastonan pa asina yega na presupuesto balansa pa aña 2017. Pa loke ta trata e debe nacional y e gastonan di interes anual, Minister Bermudez a indica cu lo busca financiamento den exterior pa cubri e gastonan aki manera na Merca por ehempel caminda e tasa di interes ofreci ta hopi abou.

Na mes momento e enfoke di e “balans budget agreement” ta conta tambe pa e gastonan di Gobierno, “a base di e balans budget mester sigui bezuinig riba gastonan di Gobierno, pues esaki ta encera cu si tin aumento den entrada, loke ta wordo cobra ta bay pa baha e debenan actual”, Minister di Finanzas a expresa.

Minister Bermudez a informa cu e la trece e mesun punto aki na atencion di su coleganan, pues nan tambe mester cumpli cu e responsabilidad pa baha gasto den nan departamento y tambe cobra e diferente tipo di entrada cu ta coresponde na cada un di nan pa asina e presupuesto no cay cortico.

E volumen di empleado di gobierno tambe ta un punto di maneho cu mester reduci pues e gastonan aki ta representa mas cu mita di e presupuesto.  E mandatario di finanzas a indica cu tambe lo tira un bista riba ‘goederen en diensten’, pues lo repasa contractnan di edificio di huur di gobierno, transporte,  cancelacion di contract entre otro.

Actualmente ta dibuhando un maneho nobo pa loke ta trata e subsidio na e organisacionnan No-Gubernamental. E ‘subsidie beleid’ lo ta basa riba e ‘output’ di cada organisacion y no riba e sistema actual di ‘payroll’. “Loke nos kier haci ta cu cada NGO ta mara contractualmente na loke nan ta presta. E contribucion cu nan ta ricibi mester ta basa na e metanan cu nan mester cumpli”, e mandatario a informa.

E fenomeno di ‘studie lening’ tambe ta uno cu den e ultimo añanan no tin un maneho adecua, pues den e ultimo 25 aña tin un suma aproxima di 250 miyon cu no a wordo paga.  Minister Bermudez a informa cu tin un ‘project leider’ caba apunta cu lo trata cu e cobransanan aki y na mes momento un oferta pa esunnan cu ainda ta pagando bek.

Finalmente Minister Bermudez a avisa na tur parlamentario cu e ta keda pendiente pa e consehonan di Raad van Advies y ta spera di por entrega e concepto di e presupuesto 2015 na tempo pa cada parlamentario pa asina nan tambe por tuma nan tempo pa repasa esaki prome cu e wordo trata den reunion publico.

Expresionnan haci den e articulo aki no necesariamente ta refleha opinion di ArenaPoliti.co