Despues di a wordo notifica di un oil spill na WEB Aruba N.V. Minister di Asuntonan Economico, Utilidad, Energia y Medio Ambiente ing. Mike de Meza a pidi un reunion cu departamento di medio ambiente y conseheronan di ministerio pa duna informacion ariba e incidente cu a tuma luga. 

Nos a wordo informa cu e oil spill a wordo causa door di un leak chikito den e sistema cu ta keinta e Heavy Fuel Oil cu ta wordo uza na WEB como combustibel. Azeta a sali hunto cu e awa cu ta bay pa lama. Departamento di Calamidad, Departamento di Medio Ambiente y Naturalesa, Directie Scheepvaart, Strand Politie, Kustwacht, Valero, NRC, Johnson, Douhsar y Bird Life Conservation a wordo envolvi. Nan a coopera y incorpora e procedura pa evita e daño bira mas grandi segun minister Mike de Meza.

Manera cu WEB a wordo notifica di un oil spill nan a tuma accion imediatamente y a bin constata unda e problema ta y a cera e sistema pa preveni mas daño. WEB ta bezig cu un evaluacion pa haci cambio necesario den e diseño di e sistema pa evita pa esaki bolbe sosode Minister de Meza a splica. 

Actualmente WEB y Douhsar ta bezig cu un limpiesa den e area pa asina nos medio ambiente no wordo afecta.  ‘Pa e parti di limpiesa ta haciendo uzo di un detergente special cu ta aproba pa departamento di medio ambiente cu tin kimico biologico pa disolve y yuda saca e azeta for di e awa. Kustwacht ta bay monitor e zona durante e dianan hunto cu otro departamentonan di medio ambiente pa tin e area controla. 

E mandatario encarga cu medio ambiente a splica cu danki na Valero cu a yuda cu e materialnan necesario pa contene e oil spill den nos lama. Mescos a gradici Johnson, Douhsar, NRC, Bird Life Conservation, Fundacion di Turtuga y tur otro departamento cu a yuda na preveni daño den e area.

Expresionnan haci den e articulo aki no necesariamente ta refleha opinion di ArenaPoliti.co