MEP ta exigi derechonan di democrasia cu e mes no ta respeta! 

Atrobe, pa di tanto biaha, MEP ta exigi loke e mes ta nenga di cumpli cun'e. Despues di cinco aña den oposicion MEP no por produci un plan, un sugerencia, ni sikiera un idea pa haci algo pa Aruba. Ta solamente den gobierno, caminda MEP por a haci uzo di trahadornan di gobierno y conseheronan paga, nan or crea e impresion di ta traha. Hasta asina, cada biaha cu MEP baha e ta laga nos pais na werki. E situacion na fin di 2009 ta djis un ehempel mas. Awor den oposicion - sin expertonan di gobierno pa traha pa nan - MEP no por produci nada. Cinco aña den oposicion y sin por mustra cu nan por haci algo pa Aruba, MEP ta recuri na gañamento y accionnan contra trankilidad y desaroyo stabil di nos pais. Tur e accion y demostracionnan di ultimo dos aña tin un autor: MEP. Loke pueblo a wak na accionnan e ultimo aña y lunanan ta nada compara cu loke MEP ta bay haci den e luna y añanan cu ta bin. MEP no tin niun iniciativa riba niun tereno cu nan por presenta na pueblo. MEP no ta kere den e forma di traha cu democrasia ta permiti. E unico forma cu a keda MEP ta pa crea intrankilidad, disturbio di orden publico, desorden y inseguridad. Asina MEP lo purba destabilisa nos pais y pone hende kere cu cos ta bay malo. E storia di e lider di MEP cu e y su fraccion ta wordo stroba pa traha den Parlamento ta djis un excusa pa hustifica e accion y desturbionan cu MEP ta planeando. MEP no ta ni bay trabou pa por wordo stroba. MEP sa cu si tabata tin eleccion awor of aki tres aña, nan no lo gana. Pesey e unico alternativa pa nan ta crea intrankilidad y stroba desaroyo di Aruba.

ACCION COORDINA
MEP ta usa algun organisacion cu ultimo aña y lunanan a organisa y participa den demostracion y accionnan. E mes un hende y gruponan ta super activo riba Facebook y otro medionan di comunicacion. No cu proposicionnan pa haci Aruba miho. Pero si cu instigacion sin argumento, gañamento, hacimento di bofon y sushamento di nomber di hende cu no ta cu MEP. Nan no ta tolera otro opinion: si bo no ta cu nan, nan ta contra bo! Y nan ta haci bo daño.

CONSECUENCIA
MEP no tin cunes kico e consecuencia di su accionnan lo ta pa pueblo. Pasobra nan no ta hiba accion na bienestar di Aruba. Nan ta hiba accionnan cu un meta politico egoista: haya poder di gobierno. Convence pueblo cu argumento y miho plan, bay eleccion y laga pueblo papia no ta un alternativa pa MEP. Nan sa cu nan no por convence pueblo. Nan sa cu nan no tin niun idea con goberna. Pesey MEP kier drenta gobierno y laga expertonan traha pa nan. Nan lo djis pone nan firma bou di cualkier plan of idea. Ta asina MEP a traha den pasado y ta asina so nan por crea e impresion di ta traha. Den oposicion MEP no por tene hende den partido cu fabor politico. Pesey drenta gobierno ta na interes di MEP mes. No pa sirbi pueblo, pero pa haya poder y bolbe hiba Aruba bek na e politica di "friends and family" y previlegionan pa partidistanan.
Esnan cu ta kere cu esaki ta djies un storia sin base, warda wak kico MEP y e mes un gruponan cu a organisa accion y demostracion ultimo lunanan, ta bay haci. Nan no tin cunes kico pasa cu Aruba. Nan ta ciego pa poder y nan no ta bay spaar nada y niun hende! Reglanan di democrasia ta cosnan riba papel cu MEP ta usa ora ta cumbini nan. Nan no ta principionan cu MEP ta kere aden of kier traha y biba cune, manera resto di nos pais. MEP ta sigui exigi loke nan no ta cumpli cune: respet pa regla, democrasia y voz di pueblo!

Expresionnan haci den e articulo aki no necesariamente ta refleha opinion di ArenaPoliti.co