Despues di 25 mil papel di corant y dos siman di trabou cu rond di 40 boluntario, awe nochi rotonde di Tanki Leendert ta bira e prome pa inaugura su decoracion di fin di aña. Comunidad completo di Aruba y en special e parokia di Tanki Leendert, ta invita pa bin presencia pa 7’or di anochi e momento cu ta dal e luznan cende. Ta un momento special cu BoBario como coordinador di e proyecto aki pa di tres aña consecutivo hunto cu directiva y miembronan di Grupo San Dominico y gerencia di Subway Aruba ta sinti hopi satisfaccion y orguyo di por comparti cu henter nos comunidad.

Grupo San Dominico ta confesa di sinti e presion di ta e prome rotonde cu ta bay habri e aña aki, pero di otro banda ta encanta cu e manera con muchanan, nan mayornan cu a bin cu amiga, tata cu a bin cu bisiña, y asina yen di hende a bini hunto pa haci un bunita trabou. Esaki ta e esencia y ehempel bibo di e trabou comunitario cu Gabinete Mike Eman II, Ministerio di Asuntonan General y BoBario kier fomenta den cada skina di nos isla y mas ainda, durante e bunita temporada cu ta dilanti di porta.

Ayera nochi ainda e boluntarionan di Grupo San Dominico tabata trahando duro tanto riba e rotonde como na cas di lider Sharlyn Tromp-Farro. Durante ultimo dos siman, chikito y grandi a duna un man den traha bolanan di papel di corant, pa despues pega nan na otro cu hopi lijm, guma nan, flit nan cu spray di auto y tambe clear pa proteha nan di awa pa ultimo fura nan. E proceso aki, manera a keda splica pa Tromp-Farro, tabata un esfuerso di e muchanan, nan mayornan, pero tambe amigo y bisiña; kier men entre 30 pa 40 persona. Te hasta un di e lidernan a tuma vakantie di un siman pa traha hunto cu ‘Oma’ di e grupo, esta Sra. Amy Farro, di dia y anochi.

E resultado di tur e esfuerso aki lo ta visibel den su totalidad awe nochi ora cu e decoracion completo keda revela. Si por menciona cu e tema ta ‘Pasco di Antanjo’ y pesey a traha un pesebre completo cu San Hose, Mama Maria, baby Hesus, tres wardado, un bishe, un burico, un cabrito y dos lamchi.  Tambe tin cuater kerstboom riba driepoot, cu ta un tecnico hopi uza den Scouting caminda ta mara palo sin uza clabo. E palonan a wordo traha tambe di corant y tela.

E kerstboom mes ta traha di cups recicla di Subway cu a pega na otro, fura, pone papel di celofan pa e efecto di luz y un luz chikito pega su tras. Nan lo ta den hemchi uza di verf pa tambe ta recicla. Pa decoracion a pidi e muchanan bin cu mea cu no tin par for di cas y cu esey a traha y decora manera un sneeuwpop. Riba e rotonde tambe ta bin hekinan chikito riba cual ta bay e nomber di Grupo San Dominico, logo di Scouting Aruba, logo di BoBario y logo di Subway.

Lider Sharlyn Tromp-Farro a comenta cu nan a keda masha contento di a haya yamada di oficina di BoBario pa participa den e proyecto aki di decoracion di rotonde. Aña pasa Grupo Scout Ora Ubao a haci esaki, pero BoBario ta kere cu ta husto pa tur hende haya un chens y asina mas hende di cada bisindario ta envolvi. Tambe nan ta contento di por conta cu e sosten financiero di Subway, cu ta patrocina e rotonde aki pa di dos aña tras di otro.

“E great di esaki ta pa mustra cu bo por traha cos recicla y hopi hende ta benta hopi cos afo. Bo ta mustra tambe e participacion di e muchanan pa nan mes sinti e balor pa traha,” Sharlyn Tromp-Farro a comenta. Ta pesey mes nan ta haci un apelacion hopi importante na pueblo di Aruba en general. “Nos ta hopi preocupa pa comunidad; pa nan ta consciente cu ta mucha a traha. Na momento cu bo haci daño na un di e cosnan aki bo ta bay hurt un mucha cu a lora e propnan aki cu su man. Nan ta echt sinti cu e ta di nan. Nos ta spera cu ningun hende ta bay kibra loke nos muchanan a inverti nan tempo y trabou den dje.”

Fuera di esey, e grupo Scout ta kere cu publica awe nochi y durante e temporada di fin di aña ta bay keda hopi impresiona di con e rotonde ta bay mustra. Otro peticion importante ta pa hendenan no purba di sinta riba e figuranan, ya cu nan no ta traha pa wanta peso. Tur hende ta bon bini pa disfruta di e rotonde y si kier saca potret, por haci esaki banda di e figuranan.

Sharlyn Tromp-Farro den number di Grupo San Dominico ta yama danki na prome luga na Subway pa confia nan cu e decoracion, na oficina di BoBario pa duna otro grupo un oportunidad tambe, na Do It Center na Shaba cu a coopera tremendamente dunando descuento pa material y luz, na Charito Kelly cu a pone su truck y su tempo na disposicion pa instalacion di e luznan y na ‘Oma’ Amy Farro pa su tempo y dedicacion.

Expresionnan haci den e articulo aki no necesariamente ta refleha opinion di ArenaPoliti.co