ORANJESTAD- Na su regreso di Uruguay unda Prome  Minister di Aruba Mike Eman a representa tanto Reino Hulandes como Principado di Luxemburgo na inauguracion di e Presidente nobo dr.Tabare Vazquez, e mandatario a bisa cu semper ta un honor p’e pa por representa Reino Hulandes y Luxemburgo na un ocasion special y importante asina. E isla chikito Aruba ta bon conoci na Uruguay, pero tambe cerca otro Presidente, Vice-Presidente, hefenan di estado y demas delegacionnan cu tambe tabata presente. “Aruba ta conoci den sentido hopi positivo”, Prome Minister a bisa.

Eman a splica cu tanto pa Reino, Luxemburgo como Aruba ta importante pa tin bon relacionnan cu paisnan bisiña. “Bo ta wak cu hopi di e paisnan ta trahando hopi duro riba temanan cu pa nan pais ta importante, pero cu pa nos tambe ta importante. Na momento cu tin mas trankilidad y mas siguridad den nos region e ta refleha positivo riba nos tambe. Cada bes cu bin un gobierno nobo cu un compromiso grandi pa expande bienestar general den su comunidad pa elimina diferencianan cu por tin cu ta conduci na pobresa, tin vision y plannan pa haci e desaroyo di nan pais mas sostenibel manera te e caso di Uruguay.” Eman a bisa cu e antecesor di e president nobo aki tabata un presidente hopi conoci y popular, el a termina su periodo y e president nobo ta bay start un iniciativa grandi pa trece tanto pa Uruguay como cu pa henter e region mas cooperacion, mas stabilidad y un mira tambe riba un cooperacion pa logra mas integracion di e paisnan den Sur America, Centro America y Caribe.

Eman, “Ora nos ta representa Reino Hulandes nos ta haya oportunidad pa topa cu otro presidentenan di otro paisnan. Cu hopi di e paisnan aki nos tin temanan importante en comun y nos ta splica loke nos ta purba desaroya pa locual ta trata Aruba su funcion como Gateway. Na momento cu nos haya oportunidad pa papia cu Ministernan di Relacionnan Exterior of Presidentnan, nos ta trece e punto aki dilanti”. Pa Premier Eman ta importante pa nan sa cu Aruba ta desaroyando su mes como hub caminda institutonan manera TNO, Rietveld Academie y otronan ta establece nan mes na Aruba y for di aki nan por brinda servicio na paisnan bisiña. Ora di scoge ken nan kier pa haci trabounan importante den nan pais, nan sa awor cu Aruba tin institutonan asina conoci di renombre mundial manera TNO, Schiphol, Rietveld Academie, Phillips y Scheepvaartschool Rotterdam cu pronto ta start na Aruba. “Tur esaki ta duna un realce na e posicion cu Aruba tin den e region. Nos a haci cambionan y pa hopi pais esaki ta iniciativanan cu nan tambe kier tuma. Nan kier sa con nos experiencia ta, ken ta asesora nos den e proceso aki y esaki ta e  momento cu nos por a introduci e impresa y institutonan estableci na Aruba cu ta haciendo e trabou aki pa nos y por brinda nan servicionan na e paisnan cu ta interesa.”

Expresionnan haci den e articulo aki no necesariamente ta refleha opinion di ArenaPoliti.co