MINISTER MICHELLE HOOIJBOER-WINKLAAR: WRONG AND STRONG 

ORANJESTAD – Lider di MEP Evelyn Wever-Croes den conferencia di prensa semanal di MEP a elabora riba decisionnan equiboca cu ta afectando ensenjansa di nos muchanan. “E ultimo kwartaal di anja escolar 2014/2015 a cuminsa, pero tin mas turbulencia cu nunca den ensenjansa. Y esaki sin duda ta afecta e calidad di ensenjansa. Semper nos conoce problemanan den ensenjansa, especialmente pasobra no tin hopi fondo ta wordo inverti den ensenjansa. Pero awor, riba dje, nos tin un minister cu ta equiboca, y no kier admiti ni coregi su erornan.

Minister a bai mete den asuntonan interno di Colegio Arubano y el’a perde e caso. Minister no kier cumpli cu debenan financiero di SKOA, y awor e caso ta dilanti hues. Minister a bai mete den asuntonan interno di scol Kudawecha pa yuda un mayor, y a termina te perhudica tur e studiantenan di klas 6 y docentenan di e scol, y awor e ta dilanti hues tambe. Siman pasa e minister a presenta su caso contra un medio di comunicacion relaciona cu e seguro di studiantenan, y di cual mi a comprende cu ta hopi puito a sali for di e macuto, mirando cuanto cos cuestionabel e minister a hasi den e caso ey. E ministerio ta literalmente na candela!

Pero locual cu ta hasi tur cos mas peor ta cu e minister no kier coregi su erornan, ni cambia rumbo di su maneho cu ta desastroso pa ensenjansa, y esnan perhudica ta studiantenan. Tur hende por comete eror, pero e eror mas grandi ta no coregi bo eror, y esey ta e problema den e caso aki. Parlamento a hasi su parti, pero lamentablemente parlamentarionan di AVP a scohe pa laga e studiantenan y maestronan cai, pa scapa cara di nan minister. Especialmente e 7 parlamentarionan di AVP cu ta bin di e area di ensenjansa a demostra nan cara berdadero.

Mi ta puntra mi mes, unda Mike Eman ta keda den tur esaki? Con Mike Eman como minister presidente por djis para un banda man crusa y djis permiti tur esaki sucede? Con e por drumi trankil anochi sabiendo kiko su minister di ensenjansa ta hasiendo?

E problemanan aki no ta keda asina, aparte di tur e casonan den Corte, e minister mester bin bek Parlamento pa defende su maneho. Y mi ta spera cu e dia ey e minister bin cu otro actitud, y bin cu solucionnan y no mas problema den ensenjansa. Nos ta trahando riba posible solucionnan pa e problemanan serio den ensenjansa, pero pa por logra, nos mester di e disponibilidad di e minister y di parlamentarionan di AVP. Ta na nan awor pa demostra si di berdad nan tin ensenjansa na pecho, of si interes personal di un minister lo bolbe prevalese”, Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co