Na e ‘Energy Summit’ di Ministernan di LGO na Bruselas lo defini uso di e fondo

ORANJESTAD/BRUSELAS- Dianan 15 y 16 di Juni 2015 Ministernan di e 22 paisnan y teritorio Ultramar di Union Europeo (LGO) encarga cu asuntonan di energia lo reuní na Bruselas pa delibera e maneho comun riba e tema ‘energia sostenibel’. Bou guia di e grupo di trabou lidera pa Aruba su representacion na UE, energia sostenibel a wordo escohí como e tema principal pa cooperacion entre e paísnan LGO habriendo caminda pa inversionnan miyonario tuma lugar den e 11 LGO’nan cu ta situa den Caribe y e 22 LGO’nan rond mundo.

E logronan di Gabinete Eman riba e tema aki a capta atencion internacional inspirando politiconan di otro teritorio y paisnan ultramar y tambe expertonan energetico di e Comision Europeo. E suma di 40 miyon Euro lo wordo inverti den Caribe y ta pone fondonan disponibel pa aplica tecnologianan nobo y yuda baha dependencia di productonan petrolero.  Un suma adicional di 18 Miyon Euro ta disponibel pa wordo usa pa cooperacion entre tur 22 LGO’nan. For di e fondo ey tambe un parti substancial ta reserva pa energia sostenibel.

22 Ministernan lo dicidi riba Roadmap
E proposito principal di e ‘Energy Summit’ ta pa establece un trayecto comun (Sustainable Energy Roadmap) pa logra un maneho di energia sostenibel y reduccion di uzo di  ‘fossil fuel’ den e paísnan LGO. Parti di e Roadmap ta encera recomendacionnan pa simplifica e programacion di e fondonan pa asina nan por wordo aplica mas lihe y mas eficiente.  Tambe lo discuti participacion di e paísnan aki den e conferencia grandi di Nacionan Uni encuanto cambio di clima (COP21) locual lo tuma lugar na luna di December di e aña aki.

E ‘LGO Energy Summit’ ta tuma lugar durante e European Sustainable Energy Week (www.eusew.eu). Ta trata di un iniciativa di e Comision Europeo cu ta promove maneho di energia sostenibel den Europa. E evento aki ta encera un cantidad grandi di actividad durante varios dia manera workshop, exhibicion y conferencianan. Minister di Economia, Comunicacion, Energia y Medio Ambiente Mike de Meza hunto cu representante di Gobierno di Aruba na Bruselas Cedrick Tilma lo representa Aruba na ambos evento. Riba potret por mira e participantenan na e Caribbean Regional Conference  caminda a dicidi cu Renewable Energy y Marine Biodiversity lo bira areanan di Cooperacion pa LGO’nan Caribense pa e periodo 2014 -2020.

Expresionnan haci den e articulo aki no necesariamente ta refleha opinion di ArenaPoliti.co