"E siman aki atrobe Pueblo por a tuma nota di un racha di tiroteo. Un racha cu a bin ta asotando nos comunidad untempo caba. Ta tristo pa mira con practicamente tur siman na un caminda of otro na Aruba tin un tiroteo. Algun siman atras,hasta cu resultado fatal pa un hoben. No ta pasa un siman sin cu ta raporta un tiroteo of atraco. Nos Aruba, caminda te cu algun aña pasa ainda tur hende por a cana trankilo, ta riba caminda di decadencia pa loke ta criminalidad y siguridad.

Den pasado tabata tin un "Vangnet" hudicial caminda Aruba por a conta cu un combinacion di Cuerpo Policial, Warda Nos Costa, Radar, Kustwacht y Helicopter. Sin duda tabata tin un lucha mas tenaz contra criminalidad, den cual tabata tin un liña di maneho cla y raspa den e aparato di Husticia. Awendia mester constata cu e maneho hudicial a para bira "Ad-Hoc". Criminalidad ta sigui desaroya y e Pueblo di Aruba ya no ta sinti nan mes sigur mas den nan mesun cas mane 10 aña pasa.

E factor di seguridad, cu pa nos ciudadanonan ta sumamente importante, ta wordo ignora cu consecuencia notabel. E cantidad di arma cu tin de circulacion ta un preocupacion realy ta parce di NO tin e prioridad di e mandatario di Husticia pagara e toro na su cácho! Por ehempel: Aruba ta sin helicopter ainda! E radarnan, cu segun e Minister no tabata sirbi of no tabon pa Aruba, a wordo manda Sint Maarten y Boneirocaminda nan ta operando den tur nan splendor! Pa loke ta e departamento di Warda Nos Costa, cu ta resorta pa algun tempo caba bou di Cuerpo Policial, tan sin un liña fiho di maneho. Tampoco tin un continuacion den e aspecto di Recurso Humano den Cuerpo Policial, ya cu no lo tin polis nobo cu lo drenta den servicio den aña 2015. Si continua cu emodus operandi actual, no solamente e organisacion Policial sino full e cadena Hudicial lo tranca sigur den nan operacionan mas basico!

Pa nos Fraccion e ta keda un preocupacion grandi, ya cu un biaha mas ta corta den e presupuesto di Husticia. Gobierno a dicidi di corta den e presupuesto di overtime pero di otro banda no a tene na cuenta cu tin na e momento aki un scarsedad di polis. Mirando cu no ta bay tin un lichting nobo di polis na 2015, e pregunta a bay pa e titular di Husticia, ta con e tin pensa di atende cu e problematica aki. Gobierno ta papia di lo promove na traha roosternan mas eficiente, pero te ainda no ta cla ta con e mandatario di Husticia tin pensa di haci esaki den practica, ya cu inroostering di por ehempel CuerpoPolicial ta mara na ley y te ainda no tin ningun cambio di e ley aki den tramite.

Ta bira ora pa e gobierno actual tuma Husticia di nos Pais mucho mas na serio pa asina por salvaguardia y garantisa siguridad di Pueblo Arubano y tur cu ta bishita nos Pais. Na final Aruba Merece Mihor!" E Parlamentario a termina.

Expresionnan haci den e articulo aki no necesariamente ta refleha opinion di ArenaPoliti.co