Dentro di poco e atencion di Aruba completo lo ta dirigi riba e presupuesto 2015. E presupuesto riba su mes ta wordo considera como e ley di mas importante di pais Aruba. Usualmente un presupuesto ta consisti di diferente presupuesto individual pa cada ministerio cu hunto ta formalisa e presupuesto di nos pais. E presupuesto di un pais ta den esencia pa ilustra con gobierno ta gasta e placa di e cuidadano pagador di belasting. Pesei nos constitucion ta reglamenta ki ora e presupuesto mester wordo manda parlamento y cu debatenan lo tuma lugar pa asina e presupuesto despues por conberti su mes den ley.

E ta importante pa pueblo sa cu ta parlamento ta esun cu ta dicidi con fondonan publico ta wordo gasta y con hopi impuesto lo wordo colecta. Esaki ta un caracteristica fundamental di democracia pa e placa di pueblo wordo gasta na un forma responsabel, transparente y cu parlamento ta bou control. Lamentablemente e parti di control riguroso a laga di desea pa e presupuestonan desde 2010 te cu awor. Pero no solamente control riba presupuesto tawata falta sino tambe capacidad di parlamentarionan den nan trabou.

Den 5 anja Gabinete Eman tawatin un deficit acumulativo di 1.733 biyon florin (averahe deficit 346.8 miyon). Remarcabel di esaki ta cu Gabinete Eman a cuminsa cu un deficit di 188.6 miyon na 2010 y structuralmente a continua na aumenta deficit aki te ora e la yega na 443.9 miyon na anja 2014. Consecuentemente e debe nacional cada aña a subi y awor a yega te 81.7% algo di condena!

Ta di lamenta cu durante full e periodo aki no tawatin niun parlamentario di AVP cu tawatin e corahe di frena e abuso cometi cu placa di pueblo. Nan a prefera di ignora e situacion y a opta pa pensa riba nan propio saco biahando tur ora y ora di reunionan hiba debatenan mediocre di bou nivel. Den transcurso di e dianan y simanan benidero pueblo por spera di nos hopi comunicado informativo relaciona cu e manera cu Gabinete Eman ta malgastando placa di un pueblo cu despues si mester carga peso di medidanan cu nan kier impone!

Expresionnan haci den e articulo aki no necesariamente ta refleha opinion di ArenaPoliti.co