E slogan pa eleccion 2017 di partido ReD Democratico ta “Voz di pueblo den Parlamento.” Un forma cu e slogan ta refleha den e plannan di ReD ta cu ReD kier introduci un sistema digital pa esnan cu registra serca ReD laga sa nan opinion riba leynan cu ta wordo trata den Parlamento. Den otro palabra; un tipo di encuesta/referendum digital prome cu cada votacion den Parlamento. E sistema digital ta DemocracyOS y ta wordo usa pa cierto partido den otro pais. E programa di ReD ta bisa tiki di e proposicion aki. Den un comunicado di prensa si a duna un splicacion mas amplio di e proposicion aki. ArenaPoliti.co a haci sr. Rudy Lampe, candidato #2 y secretario di ReD, algun pregunta pa haya informacion adicional tocante con e proposicion aki lo mester funciona si ReD logra un of mas asiento.

Ken por participa
Sr. Lampe ta splica cu pa por participa bo mester registra serca ReD y contribui na e vereniging di ReD. Riba e pregunta si parlamentario di ReD semper lo vota di acuerdo cu e resultado di e consulta digital, sr. Lampe ta contesta afirmativo: “Fraccion di ReD lo implementa e sistema di DemocracyOS, y esnan cu ta registra serca ReD y ta contribui na e vereniging aki di ReD, lo por vota y fraccion di ReD lo respeta e opinion di e mayoria den e consulta aki.”

Pues si esnan cu a registra y ta contribui na ReD vota contra un proposicion di ley, e parlamentario(nan) di ReD tambe lo vota contra, ‘en bloque’, hasta si nan propio opinion ta diferente.

… fraccion di ReD lo respeta e opinion di e mayoria den e consulta aki.”

Informacion relevante y momento di vota 
E sistema digital lo inclui informacion relevante pa e tratamento di ley en cuestion. Aki por pensa riba un conseho di Raad van Advies relaciona cu e ley en cuestion. Rudy Lampe: “Esnan registra den e sistema di ReD ta volg e argumentonan di fraccion di ReD, tin na nan disposicion via links di DemocracyOS tur e informacion necesario tocante e topico pa nan por vota di un forma responsabel y consciente.” 
Tocante e momento cu esnan registra por vota, sr. Lampe ta bisa: “Despues di tratamento pero prome cu votacion di Parlamento, e idea ta pa sigui e reunion publico y vota ora cu fraccion di ReD mester vota.”

Resumiendo e plan di ReD; ora Parlamento trata un ley, esnan cu a registra serca ReD y ta contribui na e vereniging di ReD lo haya informacion relevante di e ley via e sistema di DemocracyOS. Durante tratamento di e ley den Parlamento lo por scucha e opinion y argumentonan di parlamentarionan, incluyendo parlamentario(nan) di ReD. Despues cu e ley a wordo trata den Parlamento, pero prome cu Parlamento vota riba e ley, esnan cu a registra serca ReD por vota sea pro e ley, contra e ley of abstene. Despues e parlamentario(nan) di ReD lo vota di acuerdo cu e resultado di e votacion di esnan registra.

Expresionnan haci den e articulo aki no necesariamente ta refleha opinion di ArenaPoliti.co