DEN HAAG -- Lider di MEP ta na Hulanda hunto cu coleganan Xiomara Ruiz-Maduro y Ady Thijsen pa reunionnan interparlamentario tripartiet, y pa Reunionnan di IPKO 2015.
Durante su bishita na Hulanda, Evelyn Wever-Croes a interumpi e reunionnan tripartiet pa reuni cu otro lidernan politico cu no ta forma parti di e conferencia di IPKO.
Evelyn Wever-Croes a sera conosi cu lider di partido Partij van de Arbeid sr Diederik Samsom. Den e reunion a toca varios tema, entre otro e situacion financiero di Aruba y e necesidad pa sanea e problema aki.
Tambe a papia tocante e refineria y e necesidad pa para e desmantelacion.
A toca tambe e tema di integridad, y e necesidad pa Aruba bin cu leynan pa garantisa integridad di gobernacion.
Di parti di MEP sra Wever-Croes a expresa su preocupacion di e efectonan pisa di tur e medidanan cu ta spera nos, y a hasi un peticion na sr Samsom como partner den e coalicion hulandes actual, pa tene cuenta cu esaki.
Ambos lidernan politico a papia tambe tocante mas cooperacion entre e dos partidonan politico, y asina estrecha laso.
"Mi ta contento cu mi por a reuni cu sr. Samsom, y intercambia di opinion. E reunion a bai hopi bon, y dispononilidad pa yuda tambe tey" Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co