Minister ta contesta Parlamento atravez di prensa? 

Ya pa algun tempo fraccion di MEP ta cuestiona gobierno su maneho pa cobra belasting atrasa. Lider di MEP constantemente ta roga gobierno pa aplica un maneho mas humano riba pensionadonan. No ta husto, segun Evelyn Wever cu gobierno ta scohe oa cobra pensionadonan algun miles di florin cu a caduca caba, anto di otro banda ta regala kwijtschelding di miyones na hendenan hopi serca di nan. "Durante tratamento di presupuesto mi a bisa minister Bermudez: cobra belasting ta bo responsabilidad pero cuminsa na bo financiadonan di campanja, of serca bo propio colega minister cu a haya kwijtschelding prome cu cobra nos pensionadonan cu apenas por kom rond cu nan pensioen. Den e reunion mi a mustra tambe e documento di kwijtschelding di belasting di minister de Meza. Pero manera ta custumber e ministernan no kier a contesta. Esey tabata e motibo cu mi a traha un carta y hasi mas pregunta. Tur esaki a cuminsa ya algun siman pasa pero na Aruba mes no tabata tin mucho interes pa esaki den prensa. Prensa hulandes, den e caso aki de Telegraaf SI a sigi e discusion y despues a puntrami si mi ta lage te eynan. Mi a informa nan cu mi tabata preparando pregunta pa gobierno pasobra ami no ta laga e cos aki te ey. E ora Telegraaf a publica e noticia.
Ami simplemente ta hasiendo mi trabou. Si gobierno a contestami durante debate den parlamento nos lo ta cla caba. Pero nan a scohe pa keda keto pues carga e respinsabilidad awor. Awo cu de Telegraaf si a sigi riba e caso, na Aruba defensornan di partido AVP ta cuestiona AMI en bes di sigi investiga.

REACCION DI MINISTER DEN PRENSA : DE MEZA TA ADMITI
Mi a tuma nota di un declaracion extenso den prensa di Minister de Meza den cual e ta admiti cu su compania a haya e rebaho di belasting di 65 mil florin. Tin varios inconsistencia den e declaracion, pero mi tin cu remarca cu ta stranjo cu e minister ta prefera di NO contesta den Parlamento, no contesta mi carta, pero den menos di 10 ora a core bai prensa! Mi ta contento di un banda cu de Telegraaf a publica e escandalo aki, pasobra sino nunca lo a haya informacion. Awor mi ta spera cu e tin e mesun diligencia y contesta TUR e preguntanan cu mi a hasi den mi carta y publica documento pasobra si bo no tin nada di sconde, bo ta publica tur cos. Mi a avisa e minister caba cu mi tin documento den mi poder, kiermeen miho e pensa dos biaha prome cu e ganja mi atrobe. Principalmente tocante e fecha cu el haya e rebaho, pasobra un cos mi por bisa awor: e fecha di e rebaho NO ta prome cu e la bira minister, e ta DESPUES cu ela bira minister! Hecho ta cu e minister a haya rebaho di 65 mil florin di belasting y e trato aki no ta wordo aplica riba demas companianan ni cuidadanonan. Palabra ta awor ba Mike de Meza, publica documento si bo no tin nada di sconde!" Evelyn Wever Croes a declara.

Expresionnan haci den e articulo aki no necesariamente ta refleha opinion di ArenaPoliti.co