A huramenta un total di 33 empleado…

ORANJESTAD - Diaranson mainta un grupo grandi di empleado di Departamento di Impuesto (DIMP) a haci nan promesa di confiabilidad laboral y di mesun forma e proceso di huramentacion aki poco poco lo continua pa demas departamento y gruponan cu ainda falta pa haci esaki, asina Minister di Finanzas, Angel Bermudez mes a indica.

“Mi ta lamenta masha cu proceso aki ta tarda asina tanto y mi a wak awe empleadonan cu tin hopi aña ta traha caba na Departamento di Impuesto cu te hasta tabata ex-alumno dimi mes por ehempel. Mi ta bisa esaki tambe paso basicamente e procedura aki mester tuma luga na momento cu bo ta drenta servicio di Gobierno”, asina e mandatario a expresa despues di e ceremonia di huramentacion diaranson mainta.

Tanto e directora di Departamento di Impuesto como Minister Bermudez a haci enfasis riba e sentido y contenido di e huramentacion aki, unda cu e integridad di e personal di DIMP mester permanece na un nivel halto pa asina tur dato personal y priva wordo trata semper cu confiabilidad y cu no lo wordo comparti cu otronan a motibo personal, politico, placa of cualkier otro.

Directora di DIMP, Sra. Luenne Gomes-Pietersz a enfoca cu e huramentacion ta hopi mas cu un formalidad, pues e ta sinta na e caracter di e persona y tur empleado di ‘Belastingdienst’. “Nos ta haya nos mes cu hopi informacion di cliente na pia di trabou y cu nos  mester ta cauteloso cun’e”.

Manera ta conoci caba e departamento aki ta conta cu un retraso grandi den su proceduranan y su funcionamento. Segun Minister Bermudez e trabounan ta continua di manera consistente pa por trece e departamento aki bek den actualidad lo mas pronto posibel y esey ta trece cun’e tambe cu lo tin cambio den organisacion, pues eynan Departamento di Recurso Humano (DRH) tambe lo ta envolvi pa asina yuda y guia e reorganisacion pa otro aña tur cos ta cla na momento di ehecuta e reforma fiscal cu a wordo anuncia caba.

En berdad ta hopi reto grandi ta existi actualmente na DIMP, sin embargo directora Pieters a manifesta tambe cu desde e la asumi e cargo oficialmente 1 di Mei, e animo di e trahadonan y ekipo di maneho di Departamento di Impuesto t’ey pa enfrenta e retonan aki. “Mi ta mira cu tur tin hopi animo, smaak y gana pa hisa e departamento na otro nivel  y na mes momento pa nos drecha e servicio cu nos ta brinda na comunidad. No ta tur ora e ta na e nivel cu e mester ta, pero nos ta trahando duro y seriamente pa mehora e servicio aki tambe cu tur hende merece”, asina Sra. Pieters a expresa. 

Expresionnan haci den e articulo aki no necesariamente ta refleha opinion di ArenaPoliti.co