Comunicado di Prensa
28 mei 2015
Red Democratico Aruba 

Ban come masbango diadomingo awor pa 15.00 na Club Don Bosco, Noord

Partido Red Democratico Aruba a keda funda dia 30 di mei 2003, ke men cu e siman aki e ta cumpli su 12 anja di existencia. Na tal occasion lo tin un reunion extraordinario di su miembronan unda Rudy Lampe lo tuma despedida como parti di e directiva di Red Democratico Aruba. Na mes momento lo tin oportunidad pa un y tur bin topa Rudy Lampe, kende lo ta pa un periodo cortico na Aruba. E encuentro aki lo tuma lugar diadomingo atardi di 15.00 te cu 17.00 na Club Don Bosco den cura di misa di Noord.

E ta un actividad di fundraising tambe, pesei lo por cumpra masbango, kala, bolo etc. Partido Red Democratico Aruba ta cuminza prepara pa proximo eleccion. For di inicio e partido aki a boga pa supervision di Gobierno di Reino riba finanzas publico di Pais Aruba.  Por fin na 2015 a keda instala control financiero externo riba Aruba. E no ta bai keda eynan so, lo bin tambe supervision di Gobierno di Reino riba integridad na Aruba. Red Democratico Aruba ta apoya e control externo aki riba Aruba. Mas mecanismo di control tin, mas miho ora ta trata placa di pueblo.

Rudy Lampe ta retira di directiva cu satisfaccion di mira cu e meta di su compromiso politico a keda realiza, esta for di inicio e a boga pa supervision di Hulanda riba Aruba y easki awor na 2015 ta un hecho. Awor Red Democratico Aruba mester sigui vigila e proceso di supervision externo pa integridad y bon gobernacion keda planta riba nos isla. Pesei ta importante pa Red Democratico Aruba participa na e siguiente eleccion.

Si na 2009 a keda realiza e plan di Red Democratico Aruba, di pidi supervision y pago di debe di Aruba dor di Hulanda poniendo Aruba den e acuerdo di 10-10-10, awe pueblo lo no ta sufri bao di e medidanan. Nos lo a keda sin debe y a mara mannan di politiconan na 2010. Pero e votador a scoge diferente y awe pueblo tin cu paga pa un deroche di placa den cua pueblo no tabatin beneficio. E ta inhusto cu pueblo tin cu paga pa e malgastamento di placa dor di politiconan. Pero no por draai bek historia, no ta keda otro pa Red Democratico Aruba cu vigila pa esaki no ripiti den futuro.

Expresionnan haci den e articulo aki no necesariamente ta refleha opinion di ArenaPoliti.co