Recientemente UPP a haci un yamada di urgencia atrobe na e otro partidonan politico pa UNI den un esfuerso nacional pa evita mas metemento di e gobierno di Reino den nos asuntonan interno y asina recobra nos autonomia financiero den un forma mas acelera.
UPP sinembargo ta di opinion cu e cambionan fundamental proponi den e Compromiso Nacional aki lo mester tin un base firme, na unda e palabracionnan conveni mester wordo garantisa door di cambionan den nos leynan actual.
UPP ta sostene cualkier accion cu por contribui na un cambio di e situacion cu Aruba ta hinca aden. Pero pa UPP ta primordial pa por yega na un consenso riba kico ta e cambionan cu mester tuma lugar.
Pa nos no ta un simpel cuestion pa djis cambia un gobierno.

Den un otro articulo di UPP, publica recientemente, nos a expone e motibonan cu a induci nos pa presenta e proposicion pa yega na un Compromiso Nacional.
UPP ta di opinion cu te ainda Hulanda no a termina cu su plan maestro pa sigui doblega e gobierno entreguista cu Mike E. ta lidera.
Hulanda kier deshaci di e Islanan manera proponi door di e.o. Wilders (bende e Islanan na marktplaats) y VVD cu kier un “Gemenebest constructie”, y ya cu Statuut no ta brinda nan e oportunidad aki, a dicidi di cambia e formato pa purba influencia e opinion di e mandatarionan di e Islanan y asina realisa nan meta toch.
E meta di Hulanda ta obvio: hinca nos den scochi di Europa pa medio di cambio di nos posicion di LGO pa UPG. Esaki lo nifica cu Aruba definitivamente lo a perde su autonomia pa semper, pasobra lo ta Union Europeo cu lo  supervisa gobernacion di nos Isla.

Hulanda nunca a pordona Aruba cu, den su afan pa mas autonomia, a kibra no solamente e Antias di 6, pero tambe a kibra e dominio total cu Hulanda tabata tin riba e Islanan.

Hulanda a wordo obliga pa dedica mas atencion na e “Overzeese Gebieden”, pasobra Aruba den un tempo record a demostra di tin hendenan capas pa duna realse y contenido na un “Status Aparte”, loke Hulanda nunca a pensa soña cu esey lo por tabata posibel. Pa colmo e otro partnernan di e Antias di 5 tambe a cuminsa rebeldia, loke a resulta den e cambio di 10-10-10.

E situacion a cambia desde 2009 totalmente.
Diripiente Hulanda a haña un aliado den forma di e “braafste jongetje in de klas”. Sr. Mike E. a bin na mando e.o. cu ayudo di Hulanda, cu e unico meta pa realisa su soño narcisista pa wordo reconoci como un estadista di taya internacional manera tabata e caso di su “Nemesis” sr. Betico Croes d.f.m.
Mike E. su gobernacion, fatal pa Aruba y pa e Arubiano, a duna Hulanda e oportunidad pa logra su meta pa recobra atrobe e dominio total, sin cu esaki a coste un cen preto manera tabata e caso na 10-10-10 cu Corsow y St. Maarten.

Pero e humiliacion di e pueblo Arubiano, cu e entrega di nos autonomia financiero pa medio di e ley di CAft, ainda no a yega su punto culminante.
AINDA FALTA pa e islanan y tambe Aruba wordo obliga pa acepta e cambio di LGO pa UPG.
Hulanda tin “het braafste jongetje in de klas” y e 13 marionetanan den parlamento di Aruba na rudia caba, y consequentemente ta obvio cu nan lo no ricibi resistencia at all di Aruba pa logra e cambio pa UPG.
Esey lo bira e siguiente paso di Hulanda, y e unico forma pa para esaki ta logra un UNION NACIONAL pa salbaguardia nos autonomia y nos dignidad.

Nos ta di opinion cu - mescos cu tabata e Pueblo di Aruba cu mediante un referendum a dicidi pa scohe pa nos Status Aparte – di igual manera e Pueblo atrobe via un referendum mester ser scucha un biaha mas encuanto e escohencia entre un status UPG versus un status LGO.
Sinembargo pa e pueblo por haci un escohencia bon ekilibra y bon pensa, ta necesario pa e ser informa debidamente encuanto e pro- y contranan di ambos opcion. Y e espacio pa ser informa debidamente, gobierno lo mester duna tambe.
Aki ta na unda e UNION  NACIONAL lo tin e prome tarea, esta pa NO permiti cu Hulanda, ayuda pa Mike E. y su 13 marionetanan, maniobra Pais Aruba den un status cu lo NO ta beneficioso ni pa e pais mes, pero tampoco pa su ciudadanonan.


Den nomber di Union Patriotico Progresista – U.P.P.
Candelario A. S. D. Wever
Brazil, september 13, 2015

Expresionnan haci den e articulo aki no necesariamente ta refleha opinion di ArenaPoliti.co