Despues cu anja 2014 a sera cu un caida den turismo crusero anja 2015 no ta mustra nada diferente y mihor cu anja 2014 pa nos pais. Mientras minister Otmar Oduber tur dia ta broma con hopi turismo ta crece semper e ta lubida di informa pueblo e otro banda di medaya. Si turismo ta crece ta su deber di informa pueblo pero ora turismo ta cai ta su obligacion tambe pa informa pueblo mesun cos y esaki ta loke e NO ta haci. Ota tin caifa den turismo no ta tende nada for di e minister aki.

Pa e promer 2 lunanan di anja 2015 turismo crusero a sufri un caida di 12.1% den cantidad di pasahero y di 13.6% den cantidad di barconan crusero cu a yega nos pais. Pa e promer 2 lunanan di anja 2015 esaki ta significa un caida den cantidad di pasahero crusero di 24.1467. Esaki ta un caida dramatico y alarmente. Teniendo na cuenta cu turismo crusero ta forma parti importante den nos Mercado turistico ta yena nos cu preocupacion e situacion aki. Mientras tur otro isla, competidornan di Aruba a demostra un crecemento den e promer 2 lunana di anja Aruba a sufri un caida drastico.
Competidornan di nos pais manera Bahamas a crece cu 2.9%, Belize cu 42.9%, Caymand islands cu 17.0%, Curacao cu 6.8%, Saint Lucia cu 8.0%, Turks and caicos cu 24.8% y US Virgin island cu 4.3%. Aki ta wordo ilustra cu tin algo completamente robez pasando cu turismo crusero na Aruba. Mientras na otro islanan den Caribe e cantidad di pasaheronan ta subi aki na Aruba tawata tin un caida di casi 25.000 pasahero. Minister Otmar Oduber ta fayando barbararmente y ta carece vision pa loke ta trata turismo crusero. Nos no mester lubida y tene bon na cuenta cu nos ta den pleno high season y ja caba anja 2014 a sera cu un saldo negativo. E trend den e caida den turismo crusero a sigui den anja 2015 pa loke ta trata e promer 2 lunanan di anja.
E anja aki lo bai ta un anja sumamente dificil pa loke ta trata turismo crusero. Aunke minister Otmar Oduber no kier admiti esaki pero lamentablemente esaki ta e caso. Recientemente mi a publica e schedule APA N.V. di barconan crusero pa anja aki y mi a reta minister Otmar Oduber pa bin demostra lo contrario, te cu awe sr Otmar Oduber no a reaciona riba e schedule cu a wordo publica cual ta stranjami masha hopi mes. Den e schedule tawata tin un cantidad di barconan crusero grandi cu cancela nan callsnan pa Aruba. Na comienzo di anja te hasta Otmar Oduber e menciona cu e anja aki lo sera cu un crecemento di 3 barco crusero. Un biaha mas a scohe pa ganja pueblo y malinforma nos communidad.
Recientemente APA N.V tambe a duna di conoce cu e barco crusero Gemini tambe lo cancela algun calls pa Aruba. Aki no ta trata di algun calls sino di un total di cancelacion di 22 barco crusero di Gemini. Cada barco crusero di Gemini tin capacidad pa 1200 pasahero kiermen aki nan nos ta papiando di un cantidad di casi 27,000 pasahero crusero cu NO lo bin nos pais sin conta e cantidad di otro barconan crusero grandi cu ja caba a cancela nan callsnan.
Nos no ta na altura kiko ta pasando cu nos turismo crusero pero nos ta kere si cu minister Oduber debe pueblo un splicacion riba e situacion di crisis den nos turismo crusero. Nos no mester lubida cu e gobierno aki a inverti 80 miyon den e locura di tram pa acomoda turistanan crusero pa bai den caya G.F. Betico Croes. Recientemente gobierno a anuncia un plan di 2.6 miyon pa un inversion den e welcome plaza. Hopi placa ta wordo inverti anto di otro banda e cantidad di barconan crusero ta cayendo. No solamente e cantidad di barconan crusero sino tambe catidad di pasaheronan crusero. Minister Oduber no a duna cuenta na pueblo kiko ta pansando y ta ta esun responsabel pa tur e caida nan aki. Anja 2014 ja caba a sera cu un caida den cantidad du barco y cantidad di pasahero crusero. Manera cu anja 2015 ta bayendo e anja lo bolbe sera cu un caida. Tin un problema structural y minister Oduber ta esun responsabel pa e caida aki. Nos no por culpa ningun otro hende pa e caida preocupante aki. A yega e momento pa nos haya sa kiko ta pasando cu nos turismo crusero. Pakiko e barconan ta cancelando nan callsnan pa Aruba? Kiko minister Oduber ta haciendo pa atrea mas barco crusero pa Aruba? Dikon tur e otro islanan den Caribe si turismo crusero ta creciendo?
Nos por conclui a base di e trend negativo den turismo crusero cu turismo crusero ta den un crisis! 

Expresionnan haci den e articulo aki no necesariamente ta refleha opinion di ArenaPoliti.co