Recientemente a wordo organiza na Aruba e coferencia di CATA cual a wordo oragniza pa Aruba su partnersnan den Latino America.
Latino America ta e Mercado number 2 di nos turismo y muy en especial e Mercado di Venezuela. Semper hopi ta e turistanan Venezolano cu ta bin Aruba pa disfruta di loke Aruba tin di ofrece. E Mercado di Venezuela ta nos di 2 mercado mas importante. Desde anja pasa tin un trend nobo si den e asina yama turistanan Venezolano.
Mientras Otmar Oduber ta gaba tur dia con bon nos turismo ta bayendo e como e titular di turismo mester por sa mihor, E mester por realiza cu e crecemento den nos turismo ta danki na e crecemento di ‘’turistanan’’ di Venezuela. Promer kwartaal 2014 a sera cu un crecemento di 20.3% den turismo stayover.
Di otro banda turismo crusero a cai drasticamente y ta pasando den su peor momentonan. Turismo crusero a cai cu 43,417 pasahero durtante e promer kwartaal di anja 2015 compara cu promer kwartaal di anja 2014.
E crecemento den stayover ta bin danki na e ‘’turistanan’’ Venezolano cu ta keda Aruba un anochi of ta bin Aruba pa cumpra productonan di primera necesidad. Tur esakinan Otmar Oduber ta conta den su cifranan y ta logico cu mester tin crecemento e ora.
Si analisa e crecemento den turistanan stayover pa cada mercado, bishitantenan di Venezuela a subi cu 120.7% compara cu prome kwartaal di 2014. Ta un berguenza cu minister kier usa e datosnan aki na su fabor siendo e sa e origin di e crecemento for di turistnan di Venezuela. E trend di e crecemento for di turistanan di Venezuela ta data for di anja pasa caba. Te hasta canal di television Univision a tuma nota di e crecemento inusual aki y a traha un serie di reportahe riba e trend nobo den nos turismo. E trend aki no ta danki na mercadeo sino mas bien door di circumstancianan.
Ta di lamenta cu ningun dia e minister di turismo ta splica pueblo e crecemento manera cu e ta. E crecemento aki ta unda e problema ta sinta y caminda mi ta difrencia di opinion cu Otmar Oduber. Segun Otmar Oduber e crecemento aki ta danki na esfuerzonan di mercadeo y e ta conta tur e Venezolanonan aki como turistanan real siendo cu e turistanan aki ta bin Aruba pa e problemanan social cu tin na Venzuela. Nan ta bin Aruba pa motibo di e scarsedad di producto. Nan ta bin Aruba pasobra no por haya productonan basico mas eynan. Supermercadonan na Aruba ta yen di e ‘’turistanan’’ aki cu no ta haci uso di taxi, ni di autobus y no ta keda na hotelnan. Si nos analisa e datosnan den profundidad bo ta wak cu e cantdidad di turistanan kedando na high rise hotels a baha y cantidad du turistnan kedando na casnan y apartamentonan priva a subi explosivamente. Tur dia bo ta mira e turistanan aki den tur skina na Aruba. Awor e pregunta ta, esaki ta calidad???
Anja 2014 nos a surpasa 1 miyon turista anto bo ta wak un caida den e turistnan cu ta keda na high rise hotel cu 2.5%. Di otro band abo ta wak un crecemento explosive di turistnan kedando na casnan priva di 41%. E indicadornan aki ta bisabo cu e turistanan cu Otmar Oduber a trece Aruba no a bai keda na high rise sino na casnan priva y apartamento. Awor ta e turistnan nan aki nos ta gasta 73 miyon florin na mercadeo? Mi ta kere Otmar Oduber mester splica pueblo den detayes ariba e desaroyo aki cual motibo nos ta hopi preocupa pasobra ora bo kere bo ta suprasa 1 miyon turista y na hotel nan ta bai keda ta completamente robez!
Ta danki na e crecemento aki awe nos por papia di un aumento ficticio den nos turismo si bo wak cu te hasta e cantidad di turistnan for di Europa a baha. Hopi fanfaria a wordo haci pa Mike Eman y Otmar Oduber cu nan a logra trece KLM bek y wak e cifranan di turismo for di Europa anto bo ta puntra bo mes con baho un hende por ta pa hunga wega politico pa yega den gobierno. Awe cu KLM bulando tur dia nos tin un caida den cantidad di turistanan Europeo. Den pasado cu KLM a stop tawata tin un crecemento.
Europa a baha cu 12.2% (2421 bishitante menos) compara cu e prome kwartaal di 2014. Hulanda a baha cu 8.7% (840 turista menos cu e mesun periodo na 2014).
Otmar Oduber mester bira serio den su trabou, splica pueblo e situacion di turismo manera cu e ta y tambe splica pueblo dikon turismo crusero ta cai e anja aki, dikon banco central a proyecto cu e cantidad di stayoversnan lo cai y tambe dikon e catidad di placa cu nan ta laga atras tambe lo cai e anja aki segun Banco Central. Splica pueblo di e trend nobo den turismo y for once and for all ta sincero cu pueblo. Un minister cu kier tira santo den wowo den pueblo no ta un digno representante di su pais y ta di condena cu e kier hunga wega cu cifra si e ta bon na altura kiko ta pasando den nos sector turistico!

Expresionnan haci den e articulo aki no necesariamente ta refleha opinion di ArenaPoliti.co