Awor cambionan structural den aparato di gobierno tin cu sigui!

"E cambionan cu nos a sostene y introduci den nos sistema di seguro social, specialmente den e pensioennan a duna su fruta. E fondo di pensioen di behez (aov) ta na caminda pa stabilidad pa sigur e benidero 20 aña. E sistema di pensioen general cu a wordo introduci cu sosten di e fraccion di AVP na 2011, lo sigura cu pensionadonan tin un miho entrada den futuro y no lo mester depende solamente di e pensioen di behez. E cambionan haci den e fondo di pensioen di empleadonan publico y di maestronan di scol, tambe ta sigura cu nan pensioen ta sigura pa e benidero 20 aña. E fondo a yega bek na e cobertura di 100% cu ta haci e fondo solvente y no mas dependiente di gobierno. E introduccion di e "health tax" pa tur hende cu ta cumpra cos na Aruba, tambe e toeristanan, a baha e dependencia di e seguro medico general (AZV) di placa di gobierno. E meta pa haci AZV completamente independiente di contribucion di gobierno ta casi bira realidad. E cambio y reformanan, cu den algun caso individual tabata dificil, awe ta mustra di a duna e resultadonan cu a fiha." Esaki ta loke Rene Herde a declara dialuna merdia saliendo for di un reunion cu miembronan di e fraccion di AVP. E fraccion ya tin simannan ta prepara pa tratamento di e presupuesto 2015. Den e cuadro aki nan ta wak tur cifra y tur area di maneho, pa wak unda tin cu mehora.

STABILIDAD
E stabilidad cu e fondonan social tin awe ta un di cambionan mas sobresaliente di e ultimo añanan. Durante di e crisis financiero mundial, rond di mundo fondonan social y di pensioen a sufri masha hopi. Nan inversionnan a bay perdi. Den algun pais hasta e placa pa paga e pensioen di e miembronan di e fondo a bay perdi, lagando pensionadonan sin entrada. Na Hulanda mes mester a baha e suma di pensioen. Na Aruba e mes un cos lo a sosode si no a actua lihe y trece cambio. Rene Herde: "Ora nos a drenta parlamento na fin di 2009 e prome ley cu nos a trata tabata e presupuesto adicional di gobierno di MEP pa fia 100 miyon florin. Entre otro pa paga placa di pensioen cu tabata debe e fondo di pensioen APFA. E fondonan tabata na caminda pa bancarota. E pensioen di pensionadonan tabata seriamente na peliger. Mescos tabata e caso cu e fondo di pensioen di behez. E seguro medico AZV tabata tin mester di mas cu 140 miyon florin pa aña pa cubri su gastonan. Ningun di e fondonan tabata sostenibel. Den algun aña nan lo a kibra y laga mas cu 20 mil famia sin entrada. For di 2010 hunto cu gobierno di AVP nos a cuminsa trece cambio den forma gradual, pa nos economia por cargu'e. Poco poco e fondonan a lanta atrobe y den algun aña nan lo funciona completamente los di e contribucion adicional di gobierno. Esaki tabata e metanan na 2009: 1. Salba e fondonan y sigura entrada di 20 mil pensionado. 2. Sanea e fondonan y pone nan traha sin cu gobierno tin cu pone placa aserca. E cambionan cu gobierno di AVP a presenta y cu nos a sostene a duna exactamente e resultado aki. Awe e fondonan y Aruba ta para mas fuerte." Asina Rene Herde a bisa. Den e simannan cu ta bin esaki lo ta un di e temanan hopi discuti den politica na Aruba.

Expresionnan haci den e articulo aki no necesariamente ta refleha opinion di ArenaPoliti.co