Esaki ta e capacidad y disciplina cu nos ta spera di Gabinete Mike Eman 

E presupuesto 2015 ta bay wordo trata na fin di e luna di april. Ya for di algun siman pasa lider di e fraccion di AVP a menciona e norma y cuadro financiero cu lo usa pa analisa e presupuesto di gobierno. Siman pasa e Comision Financiero Economico di Parlamento a reuni cu diferente instancia riba economia y finansa di nos pais. Ora caba di haya tur conseho lo ta na Parlamento mes pa trece cambio, ahusta, modifica y aproba e presupuesto. Considerando loke a sosode aña pasa cu gobernador a haya instruccion di Hulanda pa no firma e presupuesto, Parlamento ta hopi mas detaya y exacto den su preparacion y ta tuma mas tempo y conseho di expertonan, prome cu trata e presupuesto. E fraccion di AVP en particular ta haciendo esaki. Apesar di ta sostene e gobierno di AVP, ta riparabel con nan ta analisa tur documento y conseho y cuestiona conseheronan pa haya sa mas concreto posibel kico por y kico no por.

CUADRO FINANCIERO 2014-2018
Un di e set di criterio cu e fraccion di AVP ta usa e aña aki pa analisa y evalua e presupuesto di gobierno ta e "cuadro financiero di mas aña 2014-2018" cu a wordo aproba na fin di aña pasa. E cuadro aki ta indica e margennan financiero cu gobierno di Aruba mester tene su mes na dje pa yega e situacion di "Balanced Budget" na 2018. E otro set di norma cu e fraccion di AVP ta usa ta e "Balanced Budget Akkoord"  cu a fraccion di AVP a acorda cu gabinete Mike Eman na fin di 2013. Banda di esaki ta haci bon uso di e consehonan di IMF y Raad van Advies (cu ta inclui e conseho di CFT).  

"ON THE DOT"
Un di e criterionan of normanan mas importante den e presusuesto di tur pais ta e porcentahe di e deficit. Esaki ta e diferencia entre e total di entrada y e total di gastonan di gobierno. Union Europeo ta usa e norma di 3% di GDP como maximo pa e deficit riba presupuesto. Pa e fraccion di AVP tabata importante pa wak si gobierno lo a logra cumpli cu e porcentahe di e deficit di 3.7% cu a pone como meta pa 2015 den e "cuadro financiero di mas aña 2014-2018". Den e presupuesto cu gobierno a presenta na Parlamento e deficit ta exactamente loke a pone como meta pa 2015, pa asina gradualmente yega 0% di deficit na 2018 of prome. Rene Herde: "Ta bon pa wak cu gobierno a cumpli cu e meta di baha e deficit riba presupuesto na exactamente e porcentahe cu a palabra. Nan ta 'on the dot' manera ta bisa na ingles. Tanto den porcentahe como den e suma di e deficit e ta exactamente loke a palabra. Esaki ta mustra e capacidad y disciplina cu ta spera pa sigui cu reforma di presupuesto y pone finansa publico na orden sin stroba economia di sigui crece. Ta esaki nos a spera. Ta esaki nos ta bay sigui exigi." E siman aki Parlamento lo sigui prepara pa tratamento di presupuesto.Por spera hopi mas informacion di e fraccion di AVP prome cu fin di luna ora trata e presupuesto. 

Expresionnan haci den e articulo aki no necesariamente ta refleha opinion di ArenaPoliti.co