Ta busca forma pa yega e metanan mas lihe posibel sin afecta economia y mercado laboral. 

Den e fase final di analysis y preparacion pa trata presupuesto ta bira mas cla kico ta e prioridadnan di cada partido y con nan kier logra e metanan. Pa fraccion di AVP e meta principal a corto plazo ta keda pa yega e punto di 'Balanced Budget' (= Presupuestonan Balansa den cua e entradanan di gobierno ta cubri su gastonan sin cu tin cu fia placa extra).  Den e plan di maneho di gobierno lo yega e punto aki na 2017 pa 2018. Segun calculacionnan financiero gobierno lo tin un surplus chikito di 25 miyon na 2018. E meta aki ta importante pasobra e ta nifica cu na e momento ey no mester fia placa mas pa cubri gastonan regular di operacion. Tin diferente cos cu por haci pa yega e punto di "presupuesto balansa". Por hisa entrada di gobierno, baha su gastonan of tur dos. Fraccion di AVP a sostene e maneho di baha gasto y hisa entrada hunto pero gradualmente. Anto importante den esaki ta e reorganisacion di aparato di gobierno pa elimina tur forma di ineficiencia, trabounan innecesario of antigua, elimina trabou dobel y mehora servicio na publico door di laga empleadonan publico sigui training, ocupa otro funcionnan nobo, haci hopi uzo di internet pa servicionan di gobierno. Esaki ta un di e formanan efectivo pa baha gasto gradualmente y den forma structural. E reforma di e sistema di pensioen tambe a contribui hopi. Mientras a baha e costo di pensioen, a sigura e pensioen di tur trahador y maestro di scol pa futuro.

AUMENTA ENTRADA DEN FORMA GRADUAL
Pa yega punto di "balanced budget" gobierno tambe a aumenta su entradanan, pero no den e forma drastico di introduci formanan di belasting nobo of door di aumenta e BBO manera a wordo sugeri. Den su luga e minister di finansa a sugeri pa cobra e belasting cu tin riba caya cu hendenan no a paga ainda. Si cobra mitar di loke tin riba caya so caba e ta soluciona e problema di e deficit pa e benidero añanan y ta yega e punto di "balanced budget" lihe. E forma aki ta mas facil pa ehecuta ya cu no tin cu introduci niun belasting nobo. Djis cu tur hende tin cu paga loke nan debe na belasting. Un otro forma ta cu por hisa e "health tax". Di e forma aki no ta introduci niun belasting nobo tampoco. Ademas ta logra cu AZV ta haya e placa cu e tin mester pa cubri gastonan medico di henter pueblo y gobierno no lo tin cu contribui na AZV cu e suma di alrededor di 60 pa 100 miyon florin extra tur aña (=e 'landsbijdrage'). Esaki tambe ta un forma pa baha gasto di gobierno (na AZV), percura pa AZV mes cubri gastonan medico, sin introduci belastingnan nobo. E forma aki no ta aumenta e prima di AZV pa trahadornan y doño di trabou, pero ta laga tur hende - tambe e 1 miyon turistanan cu ta bin Aruba - contribui na cubri gastonan di nos pais. Di e forma aki no ta trahadornan y doñonan di trabou so ta cubri tur e gastonan di AZV.

Den fraccion di AVP ta studiando tur e alternativanan aki. Pero loke ta keda prioridad ta pa yega e punto di 'balanced budget' mas lihe posibel sin stroba crecemento economico cu ta sigura mas entrada y mas cupo di trabou pa nos hendenan. A largo plazo e meta ta keda pa sigura finansa publico sostenibel. Tambe pa esaki e fraccion di AVP ta preparando cambionan den ley y den organisacion di aparato di gobierno.

Expresionnan haci den e articulo aki no necesariamente ta refleha opinion di ArenaPoliti.co