DEFICIT RIBA PRESUPUESTO 2015 A BAHA TE 3.7% MANERA PLANEA

"Aña pasa e deficit riba presupuesto tabata 9.3%. Un deficit mucho halto. E aña aki e deficit a baha te na 3.7% manera planea den e proyeccionnan di mas aña di 2014-2017. E deficit halto di aña pasa tabata debi na e contribucion inusual di 170 miyon florin na e fondo di pensioen di trahadornan di gobierno y maestronan di scol (APFA) y na 50 miyon extra pa cubri costonan di cuido medico di AZV. Sin e contribucion inusual aki e deficit lo tabata rond di 4.3%. E cifranan aki ta nifica cu e deficit ta wordo reduci gradualmente manera planea. Si sigui e trend aki e deficit lo conduci na un surplus chikito di 0.5% na 2018. Esaki ta e maneho cu gobierno a presenta aña pasa na parlamento. Nos ta contento pa wak cu riba e punto importante aki e ta tene su mes na e meta cu a fiha. E ta mustra un disciplina cu nos kier wak den tur area."
Na palabra ta Rene Herde', lider di e fraccion di AVP den parlamento. E fraccion di AVP ta analisando e presupuesto 2015 cu lo wordo trata den parlamento na fin di april. Prome cu yega na tratamento final, lo tene reunionnan riba henter e presupuesto, pa asina haya un bista completo. Rene Herde': "E presupuesto ta e ley mas importante cu nos ta trata den parlamento tur aña. E ley di presupuesto ta determina con gobierno por bay usa e entradanan di belasting di pueblo, pa haci tur loke gobierno ta responsabel p'e. Pesey nos mester trata e presupuesto ora nos caba di haya tur informacion relevante. Nos kier scucha organisacionnan y instancianan cu por duna un punto di bista valioso for di nan responsabilidad. Cuminsando mayan diabierna nos lo reuni cu Raad van Advies, Banco Central, Camara di Comercio, ATIA, Minister di Finansa y otro minister y expertonan. Ora nos reuni cu e minister di finansa, nos lo papia tambe cu expertonan di Departamento di Belasting y di Finansa Publico. Esey ta e reunionnan cu nos lo tene den comision financiero y economico di parlamento. Banda di esey nos lo busca hopi mas informacion di otro expertonan como fraccion di AVP. Ora nos ta cla cu esaki, nos lo manda nos preguntanan scirbi pa gobierno. Y ta te ora nos haya e preguntanan aki bek, nos lo trata e presupuesto den reunionnan publico di parlamento. E ta un proceso extenso cu no a cuminsa ayera ora e presupuesto a drenta, pero hopi mas tempran. Pa mas tempran lo trata e presupuesto den didos mitar di april."

MANEHO DI FINANSA
E fraccion di AVP a cuminsa cu preparacion pa tratamento di presupuesto ya for di luna di december. E presupuesto di 2014, e cuadronan financiero fiha na 2014, e acuerdo riba "Presupuesto Balansa" di 2013, e conseho y raportnan cu a wordo trata, tur ta wordo revisa pa fiha e cuadro y normanan cu e fraccion di AVP lo usa pa evalua e presupuesto 2015. Rene Herde': "Loke nos a wak te awor, ta cu gobierno ta kedando dentro di e cuadronan financiero cu a fiha for di 2013. E discucion ta con pa sigura cu e ta keda den e cuadronan aki y kico mas por haci pa yega na presupuestonan balansa mas lihe y asina reduci e debe mas lihe tambe. Den e simannan cu ta bin esey mester bira cla pa nos. Den e reunionnan publico nos lo presenta proposicionnan pa sigui, cambia of accelera e proceso aki."

Expresionnan haci den e articulo aki no necesariamente ta refleha opinion di ArenaPoliti.co