E miho forma pa huzga si e maneho financiero cu gobierno ta hiba lo conduci na mehora finansa publico manera palabra, ta pa wak si gobierno ta cumpli cu e normanan financiero palabra. Tambe si riesgonan pa finansa publico cu a wordo señala na 2009 y despues, a wordo elimina. Tin cuatro pregunta importante pa yuda haya sa con ta bay cu finansa publico. E pregunta ta: 1. Gobierno a tene su mes na e normanan poni den e cuadro financiero palabra? 2. Gobierno ta bay yega e punto di Presupuesto Balansa den e tempo cu a palabra? 3. Gobierno a logra reduci e riesgonan financiero cu tabata tin? 4. Condicionnan economico di Aruba ta favorabel pa carga e reforma structural di finansa publico? E contesta riba e preguntanan importante aki lo splica tambe con bon e presupuesto 2015 ta pa logra e reforma di finansa publico.

CUADRONAN FINANCIERO
Gobierno a fiha dos cuadro financiero pa e benidero añanan. E prome ta e acuerdo di "Presupuestonan Balansa" ("Balanced Budget Akkoord") y e otro ta e "Calculacionnan di mas aña" (="Meerjaren ramingen"). Tur dos cuadro ta forma e normanan financiero cu presupuestonan mester cumpli cun'e. E prome ta fiha entre otro e suma maximo cu por usa pa tur gasto y inversion di gobierno. E suma aki ta 1350 miyon florin pa aña. E aña aki e total di gasto riba presupuesto a yega 1336 miyon. Esey kier men cu e presupuesto pa 2015 a keda bou di e suma di 1350 poni den e acuerdo. E ta tambe casi 75 miyon florin menos na gasto cu aña pasa.

NORMA PA DEFICIT
Un di e normanan mas importante den tur pais y tambe pa presupuesto di Aruba, ta e porcentahe di e deficit. Aña pasa a palabra cu e deficit e aña aki no tin mag di ta mas halto cu 3,7%. Esaki mester baha te yega 0% na 2017/2018. Den e presupuesto di e aña aki e deficit ta exactamente 3,7% manera palabra. E proyeccion ta mustra cu lo yega e 0% na 2017 pa 2018 manera palabra.

RIESGONAN
Den e encargo di gobernador na formador di gobierno na october 2013, a enfatisa e importancia di limita e riesgonan pa presupuesto. Den esey gobernador a menciona en particular e riesgo cu e fondonan social ta forma pa presupuesto. Den e prome conseho di e organo Hulandes CFT tambe a menciona con importante ta pa sanea e fondonan social di APFA, AOV y AZV. E proceso di sanea e fondonan a cuminsa ya algun aña pasa. Gradualmente a trece cambionan necesario. Cu e inversion di 170 miyon den APFA na 2014, a sigura cu e fondo aki ta yega na e cobertura di 100%. E fondo di AOV tambe lo yega na un surplus na 2017. E fondo di AZV falta un tiki pa por cubri tur su gastonan cu su entradanan. E ora e fondo aki tampoco no mester depende mas di e contribucion ('landsbijdrage') di gobierno. Tur e riesgonan financiero di e fondonan aki cu tanto a teme pe, a keda elimina door di e maneho financiero cu a hiba. Ademas a salba e pensioen di tur e pensionadonan cu tabata na peliger.

ECONOMIA
Crecemento economico ta indispensabel pa cualkier pais. E forsa economico ta duna espacio pa e reforma tuma luga bou condicion mas stabiel. Tur pais ta busca pa crea un crecemento economico pa haya mas entrada. Aruba a logra un crecemento economico asombroso cu a bay di -15% pa + 3% den tres pa cuatro aña. Pa e añanan cu ta bin expertonan ta anticipa cu esaki lo keda stabiel. Esey ta haci cu e crecemento economico aki ta duna espacio pa e reforma financiero por tuma luga cu mas trankilidad.

E contesta riba e cuatro preguntanan crusial cu a menciona ariba pa huzga si e presupuesto ta cumpli cu e exigencianan y si e maneho ta bay duna resultado, ta: SI ! E presupuesto 2015 ta keda den e cuadronan fiha y e reforma di finansa publico ta riba bon caminda manera palabra. Discusionnan riba gasto y entradanan pa cada ministerio semper lo tin. Cada gobierno ta fiha su maneho cu ta resulta den presupuesto. Importante ta cu e presupuesto ta keda den e cuadronan financiero palabra y no ta kita nada di e metanan fiha pa yega na 'Presupuestonan Balansa' na 2017/2018. Despues di esey lo cuminsa paga debenan di ultimo 29 aña gradualmente.

Expresionnan haci den e articulo aki no necesariamente ta refleha opinion di ArenaPoliti.co