E siman aki a bira conoci e Protocol cu Gabinete Eman a sera cu Hulanda pa asina por trece trankilidad den Reino pa locual ta e supervicion financiero di CFT riba e finanzas publico di nos Pais. En corto por ser bisa cu e Protocol di CFT ta nada mas cu un camisa di forsa pa obliga Gabinete Eman caba cu su mal maneho financiero.

Ta bisto cu Hulanda no ta confia e maneho financiero di Gabinete Eman y a busca tur manera na alcanse di Reino pa coregi e rumbo scohi. A purba via KB y awor a bay asina lew di pone Minister Eman doblega y firma oficialmente pa CFT supervisa su gobierno. E realidad cu e cifranan financiero di nos Pais ta refleha, e hecho cu a crea un debe astronomico den poco tempo y mirando cu no tin un plan confiabel pa por drecha e situacion financiero, ta pone cu Hulanda atraves di e Protocol ta hinca Gabinete Eman den un camisa di forsa pa nan por cambia nan pensamento y coregi nan actuacion.

E protocol ta oficialisa e trabou di supervicion di CFT na Aruba y ta regula e intervencion y toma di decicion di Ministernan Hulandes den nos asuntonan financiero. Banda di esaki e protocol ta mustra riba e instruccion cu Hulanda por duna pa Aruba cumpli cabalmente cu locual CFT ta prescribi. Pues e Protocol ta nada mas cu un camiseta di forsa pa obliga Gabinete Eman pa caba cu su mal gobernacion.


7 mei 2015

Expresionnan haci den e articulo aki no necesariamente ta refleha opinion di ArenaPoliti.co