PRESUPUESTO 2015 ta cumpli cu normanan palabra!
Un di e temanan central den e tratamento di presupuesto cu ta finalisa mayan, ta si e presupuesto ta cumpli cu e normanan y e tempo den cua ta bay cumpli cu e normanan. E tema aki a bira punto central di discucion e siman pasa door di cu den e consehonan di CFT y den e acuerdo cu gobierno a firma ta bisa cu e consehonan di CFT mester wordo traduci den desicionnan concreto den e presupuesto. E pregunta ta anto si e presupuesto manera e ta wordo trata ta cumpli cu e norma y consehonan di CFT. Segun gobierno e presupuesto ta cumpli cu e normanan palabra den e cuadro financiero di 2014-2017. E consehonan cu CFT ta duna ta sugerencianan con pa yega e meta ey.

NORMANAN
Den e acuerdonan di "Balanced Budget" y e cuadro financiero di mas aña pa 2014-2017, a fiha e tempo den cua mester yega e normanan palabra. E dos normanan principal ta e reduccion di e deficit riba presupuesto y e maximo na gasto di gobierno. Gobierno di Aruba mes a fiha e maximo di gasto cu ta inclui inversionnan ya na aña 2013. E tempo ey tambe a fiha como meta pa baha e deficit te na 0% na 2017/2018. Den e cuadro financiero di mas aña pa 2014-2017 a pone aserca cu na 2018 ya lo por tin un surplus financiero (= mas entrada cu gasto). Esaki ta e momento cu lo cuminsa paga e debenan di tur gobierno di e ultimo 30 aña den forma accelera. E pregunta ta pesey si e presupuesto 2015 ta cuadra cu e normanan y si e ta cumpli cu e cifranan cu e aña aki mester yega na dje. Esey ta e criterio final pa aproba e presupuesto of no.

DEFICIT & MAXIMO NA GASTO
E deficit y e maximo na gasto ta e dos normanan principal cu ta usa. Den Union Europeo e deficit riba presupuesto ta hasta e unico norma, di tur e otronan cu a palabra, cu ta usa na fin di dia. Pa 2015 e norma pa e deficit den presupuesto di Aruba ta 3.7%. Den e presupuesto y den e maneho financiero pa e aña aki, e deficit ta 3.7%. Ta pa e motibo aki gobierno por bisa cu, a base di e informacion cu e tin di e gasto y entradanan pa 2015 te awor aki, cu no tin motibo pa haci nada extra e aña aki, pa haya mas entrada of baha gasto mas. Esaki ta cuadra cu e maneho di yega e metanan den forma gradual, sin afecta crecemento economico, creasion di cupo di trabou of forsa di compra di pueblo. Tambe e maximo di gasto den e presupuesto a keda den e margen di 1350 miyon manera a fiha for di 2013. Durante di e ultimo dia di tratamento di presupuesto, sin duda e tema aki lo ta central den e debate prome cu vota riba e presupuesto 2015.

Expresionnan haci den e articulo aki no necesariamente ta refleha opinion di ArenaPoliti.co