Fraccion di AVP ta bay uza esakinan pa analysa y evalua e presupuesto 

Presupuesto 2015 ta yega Parlamento e siman aki. Despues cu fraccionnan haya oportunidad pa analisa esaki y haci preguntanan pa compronde e maneho miho, Lo trat'e mes ora despues di Pasco Grandi. Fraccion di AVP ya a cuminsa prepara pa tratamento di e presupuesto. Banda di busca informacion na instancianan relevante manera Banco Central, lo reuni tambe cu instancianan manera ATIA y Camara di Comercio pa tende nan deseo y preocupacionnan riba temanan cu ta importante pa nan. Pero e cuadro financiero pa trata e presupuesto ta conoci.

CRITERIONAN PA EVALUA E PRESUPUESTO
Pa e fraccion di AVP tin algun criterio cu hunto ta forma e base pa e evaluacion di e presupuesto 2015. Esakinan ta na prome luga e Plan di Presupuesto di mas aña 2015-2017 ("Meerjaren begroting") cu a wordo aproba hunto cu e presupuesto supletorio na fin di 2014. Na didos lugar e plan di "Presupuesto Balansa" di 2013 cu fraccion di AVP ta sostene. E plan aki segun CFT ta contene e normanan financiero mas severo cu tin den cualkier di e paisnan di Reino. E presupuesto mester keda den e margennan cu a wordo fiha den e dos plannan cu gobierno mes a presenta pa yega na finansa sostenibel. Finalmente nos ta bay wak con gobierno ta bay cumpli cu e normanan financiero aki y si mester di mas accion pa hisa entrada of baha gastonan, manera IMF a bisa.

INVERSION
Fraccion di AVP ta keda insisti cu e rol di gobierno den desaroyo di economia ta keda crusial. E recuperacion economico y reduccion substancial di desempleo tabata pa majoria parti danki na e inversionnan di gobierno di Aruba entre 2010 y 2013. Banda di e inversionnan grandi, casi henter e presupuesto di gobierno di Aruba di 1.35 biyon florin ta bay bek tur aña den economia di Aruba. Esey ta haci gobierno e inversionista mas grandi di Aruba tur aña. Ora gobierno stop di inverti manera a sosode aña pasa pa motibo di e intervencion di Hulanda den presupuesto di Aruba, sector priva na prome luga y despues henter comunidad ta sint'e. E falta di circulacion di placa di presupuesto di gobierno den economia ta wordo sinti mes ora. Esaki a conduci aña pasa na stagnacion y menos den crecemento economico. Nos ta bay wak con e presupuesto y e maneho financiero y economico ta atende cu e reto aki. Rene Herde': "Pa nos e prioridad ta cu nos economia mester sigui crece y crea mas cupo di trabou. Aunke desempleo a baha masha hopi, ainda tin mucho hopi hende sin trabou. Pesey e maneho di crea cuponan di trabou nobo mester sigui. Na mes un momento e maneho pa yega na presupuesto balansa tambe mester sigui, pero no den e forma cu CFT ta propone. Tur cos mester bay den forma gradual. E forma bruto, cu cu medida, cu nos a custumbra di MEP of cu CFT ta propone, ta causa problemanan social cu nos mester preveni aki na Aruba. Pesey nos ta sigui sostene e maneho balansa y nos lo evalua e presupuesto cu e criterio ey tambe."  

Expresionnan haci den e articulo aki no necesariamente ta refleha opinion di ArenaPoliti.co