Un y tur por a mira e siman aki con pa e di tres luna consecutivo e prijs di gasolin y diesel a subi na Aruba y caminda ya por premira cu esaki lo tin su efectonan sumamente negativo den e poder di compra di nos conciudadanonan, ya cu pareu cu e aumento di prijs di gasolin y diesel tur prijs di producto y servicio lo sigui aumenta den e lunanan venidero. Pa no papia mes di e abuso coruptivo di hedging door di e gobierno actual, caminda tur hende ya pa 8 luna caba no ta disfrutando di un reduccion drastico di prijsnan di awa y coriente.

Sinembargo locual tin henter comunidad confundi y te hasta rabia ta e hecho cu prijs di crudo riba mercado internacional a baha drasticamente durante e ultimo aña, pero cu ta na Aruba so ningun hende ta disfruta di un reduccion di prijs di gasolin y diesel y ta wordo solamente suta tur luna cu aumentonan drastico.

Pa por demostra e abuso cu e gobierno di AVP ta cometiendo contra pueblo, partido MEP ta presenta e tabel adhunto caminda nos por mira con e prijs di gasolin, diesel y crudo (WTI crude oil) tabata na oktober 2009 tempo cu MEP a bandona gobierno y cuanto e prijsnan aki ta na mei 2015, esta bao di gobierno di Mike Eman. Aki claramente nos por mira cu e prijs di crudo West Texas Intermediate (WTI) a reduci for di 74 dollar pa bari na oktober 2009 te na 59 dollar pa bari na mei 2015, esta un REDUCCION cu 20.8%. Sinembargo bao di e mesun gobierno aki di AVP nos por mira cu prijs di gasolin a AUMENTA cu 3.3% y prijs di diesel tambe a AUMENTA cu 2% den e periodo menciona, mientras cu prijs di crudo a baha cu casi 21%.

Sin duda cu esaki ta un abuso di marca mayor cu Mike Eman y su gobierno ta cometiendo contra nos pueblo cu ya ta sufri den dolor pa tur e medidanan cu Gabinete Eman ya a tuma caba y otro medidanan cruel cu tambe ta na caminda.

Expresionnan haci den e articulo aki no necesariamente ta refleha opinion di ArenaPoliti.co