Yoramento formal den Parlamento siman pasa! 

Ta pica pa mira un minister cay riba su boca siman pasa durante e reunion di Parlamento tratando presupuesto 2015. Aki partido MEP ta referi na Minister Otmar Oduber, kende no por a wanta su propio engañonan mas y na yoramento a declara cu e compania Arubus ta bayendo financieramente hopi malo y cu mester haci esfuersonan sobrehumano pa scapa e compania aki.

Aumento prijs di diesel
Sinembargo nos tur por corda ainda con e minister aki na 2011 a scupi su gal contra e gobierno di MEP bisando entre otro cu el a haya e compania Arubus casi den bancarota, debi na algun debe atrasa di belasting y primanan di AOV cu durante algun luna no a ser paga e tempo ey. Tur hende tabata na altura cu durante 2008/2009 Arubus a confronta problemanan financiero hopi grandi debi na e aumento barbaro di prijs di diesel y cual ta necesario pa e busnan por core. Pero den e mesun rosea e minister aki no a bisa si cu tur e fiansanan miyonario cu Gabinete Oduber a hereda den Arubus na final di 2001, tur e fiansanan aki a ser paga completamente den 2009.  Alavez e no a bisa pueblo cu tabata gobierno di MEP a percura pa cumpra 11 bus Chines nobo cu airco, y cual porcierto su mesun persona a inaugura e busnan aki riba e prome dia cu e tabata minister. Tambe e no a relata ningun rato so riba construccion di e stacionnan di bus y areanan comercial di Arubus, tanto na Playa como San Nicolas door di Gabinete Oduber.

Fiansa di 16.5 miyon florin
E tempo ey na 2011 Minister Otmar Oduber cu hopi buya a haci como sifuera cu e lo ta e gran salbador di e compania Arubus, caminda e lo a percura pa haci un fiansa na banco di 16.5 miyon florin na interes abao y cu e suma aki e lo refinancia y paga tur e debenan atrasa di belasting y prima di AOV y tambe cumpra 15 bus grandi nobo, 16 autobus nobo y introduci smart card. Su ‘bunita’ plan a encera entre otro cu lo reduci e personal di Arubus door di percura pa cumpra 15 autobus chikito cu ta wordo duna na e chauffernan di Arubus y kendenan lo mester core y cubri tur e barionan na Aruba, caminda e busnan grandi di Arubus no ta core. Tambe el a obliga e staf y personal di Arubus pa entrega 10% di nan salario y beneficionan secundario. A corta den gastonan di airco di e busnan y e pasaheronan por a wel di sofoca y core den calor. Riba dje e subsidio na Arubus a ser aumenta e aña aki cu 3 miyon florin extra yegando te na mas cu 9 miyon florin y esaki meramente pa mantene e bendita tram cu no tin ningun beneficio pa pueblo.

Cantidad pasahero a baha
Tur e hazaña y hackingnan aki di Minister Oduber tin cu wordo categorisa como hopi scuma y poco chuculati, ya cu e cantidad di pasaheronan cu Arubus ta transporta diariamente a reduci drasticamente den e ultimo añanan aki. Awe e minister ta papia di compra di busnan nobo proximamente, siendo cu den apenas 5 aña Arubus ya a haya 26 bus grandi nobo nobo y 16 autobus nobo. Pregunta ta, cuanto bus mas e minister aki tin intencion di cumpra y pa cuanto hende mas core den nan? No mester lubida cu e bus electrico miyonario a resulta den un fracaso total!
Ta pesey ta pica pa mira un minister Otmar Oduber na yoramento den Parlamento siman pasa  y kende no por a mustra kico su plan y ideanan briyante ta pa por salba Arubus, ta blo papia di un supuesto bancarota di Arubus cu el a hereda, pero cu awe ta su persona mes - debi na su incapacidad - ta den manda e compania aki bancarota. 

Expresionnan haci den e articulo aki no necesariamente ta refleha opinion di ArenaPoliti.co