ORANJESTAD – E trabou cu boluntarionan di Cruz Cora ta haci na Aruba y rond mundo ta importante, pero mas ainda indepensabel. Prome Minister Mike Eman a sinti su mes honra di a wordo invita pa  celebracion di Dia Internacional di Cruz Cora, cu ta e fecha riba cual e organisacion aki a keda funda oficialmente na Ginebra, Suisa.  Un celebracion cu a tuma luga na e sede temporal di Cruz Cora , e Cas di Emergencia. Na mes momento a probecha pa simbolicamente pone e prome piedra pa nan edificio nobo. Simbolicamente, ya cu e trabounan di construccion a cuminsa caba. A toca honor na Prome Minister Mike Eman pa realisa e acto aki hunto cu su colega Minister di Asuntonan Social Paul Croes.

Prome Minister Eman a bisa cu como gobierno, e ta sinti un orguyo grandi y trankilidad di por conta cu un partner manera Cruz Cora Aruba na momento di emergencia of calamidad. “Cruz Cora  semper tey cu un dedicacion asina grandi.”

E mandatario tabatin elogio pa tur boluntario, pero no por a keda sin expresa gradicimento grandi na sra. Marietta Wanopa kende sin mas ta wordo considera e “simbolo di boluntarismo y dedicacion na Cruz Cora” pa kende e mandatario a pidi un aplauso grandi. “Tur e hobennan presente awe, ora cu nan pensa riba e trabou di Cruz Cora y e responsabilidad cu e ta bini cune, sigur ta haya den sra. Wanopa un inspiracion hopi grandi, pa tur loke el a haci tur e añanan cu ta tras di lomba y ta haci ainda.”

Mirando e grupo di boluntario presente, di cual mayoria ta hobennan, e mandatario a expresa cu no mester tin miedo cu e grupo aki ta bay perdi, pero mas bien lo sigui crece. Nan por conta riba hopi experiencia y sosten amplio den comunidad. “Nos mester di Cruz Cora y nos lo sigui den dialogo con miho nos por uni forsa den momentonan di calamidad pa Aruba ta miho prepara na momentonan di reto,” Eman a bisa.

Despues di su discurso, Prome Minister Mike Eman den forma simbolico a pone e prome bloki pa “inicio”  di construccion di loke ta bira e sede di Cruz Cora na Dakota. Aworaki e organisacion ta situa  den e Cas di Emergencia. Nan ta spera cu pa fin di aña construccion di nan sede ta cla y asina por bay den dje y laga Cas di Emergencia pa e meta pa cual el a wordo construi.

Despues di e ceremonia aki, a sigui un celebracion chikito hunto cu tur e boluntarionan di Cruz Cora y algun otro invitado. 

Expresionnan haci den e articulo aki no necesariamente ta refleha opinion di ArenaPoliti.co