ORANJESTAD – Actualmente ta na caminda pa nos isla e di tres streetcar. E vehiculo ta bin como un stap mas den culminacion di e proyecto di Renobacion di Oranjestad y ya por tuma nota di e falta cu e ta haci. Ultimo cifranan recauda ta mustra cu te cu februari 2015, e dos street car existente a transporta un total di mas cu 357 mil persona pa y for di centro di ciudad.

Despues cu na 2013 y 2014 a yega prome dos streetcar, esta e berde y e blauw di dos piso, rapidamente centro di ciudad a ahusta na e dinamica di su pasa den Caya G.F. Betico Croes, Havenstraat y Schelpstraat. Cu aumento di yegada di turista crucero y presencia fuerte di bishitantenan Latino, por a nota cu na e paradanan frecuentemente ta druk cu turista y localnan wardando pa e tram yega y nan por subi aden.

E streetcar, cual su color ta oraño, ta bin pa ocupa luga di e berde, cu originalmente a wordo crea como
“reserve”, mientras cu un di e otronan ta ricibi mantencion. Motibo cu e reemplaso a yega prome cu esnan regular, ta dor e diseño y prijs di e otronan no tabata cumpli cu exigencianan di Gobierno.

Ta bon pa informa cu entrega di e streetcar nobo aki no ta representa un gasto publico adicional pa nos, ya cu e recursonan ta forma parti di e presupuesto original pa proyecto Renobacion Oranjestad. E dos prome a wordo cumpra dor di Fondo Desaroyo Aruba, pues no a sali for di caha di Gobierno.

E streetcar  oraño, mescos cu otronan prome, a wordo fabrica na e compania TIG/m Modern Street Railways ubica na California. Diferente den e streetcar oraño ta cu su sistema di bateria ta ainda mas avansa tecnologicamente, cu esnan prome. Esaki ta nifica cu e streetcar nobo ta mas eficiente den su uzo di energia for di baterianan di tecnologia “hydrogen”.

Departamento di AruTram cu ta resorta bou di Arubus ya ta prepara pa su yegada. Un bes cu e streetcar nobo subi railnan di e ruta monumental di Oranjestad, e ta wordo acopla na e sistema computarisa cu ta coordina trayecto di cada streetcar cu un precision di seconde pa asina un no ta stroba e otro den su ruta drentando y saliendo for di Caya Principal.

Expresionnan haci den e articulo aki no necesariamente ta refleha opinion di ArenaPoliti.co