Un porcentahe substancial di e suma aki ta turistanan cu nunca lo a yega den Caya Grandi pa haci compras 

ORANJESTAD – Diferente na e pronosticonan pesimista di esnan cu no kier a wak e renacemento di Oranjestad como centro comercial y atraccion turistico bira un realidad; e streetcars a demostra nan derecho di existencia.

Cifranan concreto tuma diariamente ta duna un bista di e servicio unico cu nos isla ta ofrece na su bishitante y habitantenan. Te cu februari ultimo, e tramnan a registra 357 mil 659 pasahero. Compara cu e mesun luna na 2014, a registra un aumento di 25%.

Tur esaki mientras cu e plan pa revitalisacion di centro di ciudad ta den desaroyo pa yega na su potencial maximo. Mester tene na cuenta cu proyectonan manera Plaza Padu, Welcome Plaza dilanti di di waf y e ampliacion di waf crucero pa aumenta e capacidad di barco cu por ricibi, ta den ehecucion.

Asina mes, den un aña, djis un di e streetcars den operacion a transporta mas persona cu e poblacion completo di nos isla. Cifranan ta mustra cu un total di 166 mil 92 hende a core den e streetcar blauw durante 2014.

Solamente den luna di december ultimo e tramnan a registra mas di 29 mil persona. Esaki indudablemente ta mustra cu e sistema di tram a hunga un papel importante den e temporada di compras di fin di aña, hibando consumidornan na e diferente puntonan di caya principal.

E di tres streetcar ta yega Aruba den e proximo dos simannan pa asina drenta di biaha den operacion. Hunto cu e dosnan existente, nan ta core riba un sistema di circulacion cu ta coordina cu exactitud pa medio di computer. E ta reduci e tempo cu usuarionan ta warda na e diferente stopnan riba e ruta entre waf y fin di caya grandi.

E ta yega net na tempo pa e temporada di vakantie grandi caminda tanto turista como local por disfruta di dje. Sea ta pa conoce centro di ciudad, haci compras den caya of conoce e ruta monumental di Oranjestad, e streetcars ta ofrece un opcion diferente pa aprecia e cambio grandioso cu Caya G.F. Betico Croes y resto di Playa a conoce durante ultimo añanan.

Expresionnan haci den e articulo aki no necesariamente ta refleha opinion di ArenaPoliti.co