Cuba tin inversion halto riba nan agenda pa aumenta e fluho di capital pero kier mas enfoke riba produccion 

Finalisando un bishita diplomatico na Cuba, Minister Otmar Oduber a reuni cu Sra. Ileana Núñez Mordoche, Vice Minister di Comercio Estranhero y Inversion.  E mandatario di Aruba a ricibi un splicacion riba e plan di maneho di Cuba relaciona cu inversionnan internacional. Ta hopi importante pa sa den ki direccion specifico Cuba lo kier bay cu e posibilidadnan aki.

Cuba ta interesa primordialmente riba 11 sector specifico, pero tin 247 proyecto cu nan ta buscando inversion internacional pa nan. Un di e interesnan specifico ta riba e negoshi di pintura, tambe fabrica di embase por ehempel di boternan, boternan di plastic, caha, etc. A reitera cu e tipo di inversionan comercial cu Cuba ta desea ta actividadnan cu ta yega na produccion. Lo cual nan kier evita ta actividadnan comercial, por ehempel e patronchi di drenta Cuba y habri 10 tienda. Nan ta mas interesa den e idea pa cumpra un pida tereno, trece machin cu ta bay produci algo. Haya inversion ta halto riba nan agenda pa aumenta e fluho di capital pero kier mas enfoke riba produccion.

Si un negociante Arubiano kier establece su compania na Cuba esaki lo por den un zona specifico nobo cu yama “Zona Especial de Desarrollo Mariel” unda lo tin tambe incentivonan special di impuesto pa e inversionistanan. Pero tin mas posibilidad pa negoshi na Cuba, por ehempel cerando un cooperativa cu un negoshi Cubano. Den un caso asina e compania Cubano lo tin derecho di 51 porciento di e dividiendo y e otro partido 49 porciento. Banda di esaki tin tambe e opcion den e sector di agricultura. Tin den e zona comercial Mariel 465 kilometer cuadra di tereno disponibel specificamente pa desaroyo den agricultura.

Di otro banda Minister Oduber a comparti e tipo di negoshinan cu nos conoce como isla turistico. Un cu a hala masha atencion ta e concepto di timeshare cu na Cuba nan no tin. Minister a splica detayadamente e concepto aki unda cu na momento cu turismo no tabata den su mihor momento ta netamente e turistanan di timeshare tabata esnan cu a carga nos turismo. E mandatario orguyosamente ta splica cu Aruba awor, den e sector turistico, a sa di posiciona nos mes como number 1 den nos region.

Na final di e conversacion, cual tabata uno fructifero, a keda palabra di kier concreta un plan pa facilita e comerciantenan di Aruba riba e nivel gubernamental, cu despues ta sigui riba e nivel comercial den e sector priva. Pa por logra esaki ta esencial pa tin un palabracion entre gobiernonan. Ambos partido a acorda riba un proposicion pa forma un grupo di trabou cu riba nivel gubernamental ta bay papia riba e plan di maneho nobo di Cuba y ta bay stipula puntonan specifico pa companianan di Aruba pa asina traspasa e informacion corecto pa e companianan priva y tambe na nos Camara di Comercio. Awor ta sigui di biaha cu e pasonan pa cera e grupo di trabou aki cu lo ta consisti di representantenan di Gobierno di Aruba, entre otro di e Ministerio di Turismo, Transporte, Sector Primario y Cultura pa stimula y sigui facilita e proceso di inversion y posibel inversionnan di companianan di Aruba na Cuba.

Expresionnan haci den e articulo aki no necesariamente ta refleha opinion di ArenaPoliti.co