Posicion cla di Gobierno a pone cu e partidonan a bolbe na otro 

Diamars mainta Minister Otmar Oduber a duna e grato noticia cu Carlson Group a tuma e decision di sinta na mesa cu Aruba Growth Fund pa asina purba yega na un final pa loke ta e compra di Radisson Hotel.

Minister Otmar Oduber a haci hopi cla na tur e partidonan cu ta envolvi, e posicion cu Gobierno tin y e maneho basa riba interes general, cu no ta desea un All-inclusive na Radisson. Pa e ultimo 2 simannan a compronde cu tur e partidonan tabata na mesa y hopi ta e combersacionan cu a tuma lugar.

Minister a haya notificacion dialuna atardi cu Carlson Group ta sintando na mesa cu Aruba Growth Fund un biaha mas y cu un acuerdo di principio cu a wordo firma tambe. Den e cuadro aki a dirigi un carta cu sosten di tur e partidonan envolvi den e caso den corte caminda ta haci un apelacion na huez pa pospone e veredicto cu mester a tuma lugar diaranson. Kier pospone esaki te cu dia 23 proximo, dunando e partidonan e posibilidad pa yega na un acuerdo definitivo durante e siman aki.

Sr. Oduber a bisa “Esaki sigur ta trece un trankilidad temporal pa nos comunidad. E ta demostra e empeño cu a haci di parti tur partido pa interes general di Pais Aruba. Ora bo ta un partner cu ta resepeta otro, ta duna espacio tambe pa por dialoga, pa percura pa e maneho cu ta pone bo dilanti, ta na beneficio di comunidad di Aruba.”

E mandatario a duna di conoce cu a pesar cu ta trata aki di un transaccion priva unda cu Gobierno no tin nada di bisa y no por tin nada di bisa tampoco den djele, pero cu sin embargo e posicion fuerte cu Gobierno a tuma di mustra riba e maneho cu a anuncia y cu tabata conoci pa tur partido, a haya oido di esnan envolvi.

Minister Otmar Oduber a finaliza bisando cu “Esaki ta pone cu awe nos por anuncia cu a pidi un prolongacion di huez y cu na e momentonan aki tin un accuerdo di principio caminda Aruba Growth Fund y Carlson Group ta na mesa pa yega na un solucion definitivo.”

Expresionnan haci den e articulo aki no necesariamente ta refleha opinion di ArenaPoliti.co