Tur esaki a wordo expresa diarason, 17 di december, den oranan di merdia ora cu Harki (Nina) Dhaliwal, compaña pa su amigo Vicru Tung, a yega Aruba for di New York abordo di JetBlue y a bira e di un miyon bishitante for di exterior.

Minister di Turismo Otmar Oduber y e team di ATA hunto cu stakeholdernan a traha duro pa por a logra e un miyon turista den 2014 net prome cu cambio di aña. Pa esaki el a ricibi hopi elogio for di lider di Gabinete Mike Eman II pa a trabou grandi desplega den e sector asina importante pa Aruba su economia.

Prome Minister Eman hunto cu su coleganan di Conseho di Minister tabata presente na Inmigracion pa momento cu Nina a wordo informa door di e funcionario di Inmigracion pa primi e bel indicando cu e di un miyon turista a drenta Aruba.

E pareha aki di New York a spaar basta prome cu nan por a bishita Aruba pa prome biaha y Prome Minister Eman a expresa na nan cu e ta spera cu esaki lo no ta e ultimo tampoco.

Na inicio di su discurso e mandatario a bisa e pareha “nos ta contento cu boso ta aki, no solamente pa experencia e beyesa di nos isla, pero tambe e entusiasmo di e Arubianonan den nan hospitalidad”. E motibo, el a sigui splica, pakico un isla asina chikito manera Aruba por ricibi casi un miyon bishitante via su haf y un miyon bishitante via aeropuerto ta pasobra “den curason di e comunidad aki nos tin un miyon di curason, un miyon momento di amor pa tur esnan cu ta bishita e isla y pesey nos ta celebra e hecho aki awe cu gran amor”.

Prome Minister Eman a felicita Minister di Turismo Otmar Oduber pa su curashi di hiba e industria di turismo pa e siguiente nivel. El a corda ainda con ora cu Minister Oduber a pidi pa independisa ATA, el a bise “esaki ta un reto ambicioso cu hopi Gobierno a trata den pasado y no a logra”. Pero, “Minister Oduber gusta reto y el a acepta e responsabilidad pa guia e proceso aki pa crea e organisacion pa guia turismo di Aruba ...”.

Awe cu Aruba a ricibi su di un miyon turista, Prome Minister Eman a recorda cu ora a construi e edificio di aeropuerto a wordo bisa cu e ta “demasiado grandi pa hopi aña”y awendia e ta chikito pa un miyon di turista.

E mandatario a percura pa no lubida tampoco esnan cu den pasado a promove turismo, manera Juancho Yrausquin kende ta e politico cu vision a cuminsa cu sector di turismo y su ruman Henny Eman, kende a logra redobla capacidad di turismo. “Nan vision tabata corecto y awe nos ta traha riba nan trabou y vision pa Aruba brasa e exito di sector di turismo ...”

E pareha a ricibi diferente regalo pa purba restaurantnan di Aruba y haya un “upgrading”di nan cambernan di hotel.

Escolta pa Polis motoriza e pareha a wordo hiba nan hotel y cuminsa cu nan vakantie cu nunca lo wordo lubida.

Expresionnan haci den e articulo aki no necesariamente ta refleha opinion di ArenaPoliti.co