Nos por a tuma nota di un yoradera sin fin di parti di e "machoman" Benny S. den medionan di comunicacion pa e pueblo Arubano paga e 25 florin pa recohemento di sushi, pasobra e no ta dispuesto pa sigui hinca placa den e compania di pueblo Arubano.

En bez di para den su sapato manera un "machoman" cu semper e ta pretende di ta, y bisa cu e ta deshaci di e ley cu mi a introduci na 2007, e ta usa esaki como argumento pa cobra e 25 florin. Dicon no a pone e ley aki, cu fraccion di AVP por cierto a vota contra, un banda mescos cu ela haci cu e "Swiss-model"??
E "swiss-model" cu ta na fabor di e Arubiano, sí ela kita na fabor di e stranhero, esey sí ela core kita pa e por "wheel & deal" pa probecho personal, y tambe pa por sigui regala placa di pueblo na mafiosonan cu ta financia campaña di AVP.

Intencion di e ley cu mi persona a introduci, tabata netamente pa reglamenta cobramento pa recohemento di desperdicio door di e compania di pueblo Serlimar, cu e unico meta pa garantisa cu Serlimar lo por a ofrece un mihor servicio na e comunidad cu equiponan moderno y un personal bon prepara pa ehecuta e trabou debidamente.
Nos a propone pa cobra 10 florin.

E tempo ey e "machoman" aki a demonisa mi persona y a pidi pueblo pa no paga esaki y te hasta a bay asina leu di bisa pueblo pa bay benta e sushi na mi cas. Y awor e "machoman" ta roga e pueblo: please bay paga Serlimar. Manera nan ta bisa na Hulandes: "het kan verkeren".
E tempo ey en berdad nos kier a cuminza cobra tambe pa recohemento di sushi, y en berdad nos a SCOGE pa no introduci esaki, pasobra BBO a caba di a wordo introduci, y gobierno a tuma e decision cu e suma genera door di BBO, lo wordo inverti den Enseñanza, Cuido Medico, Medio Ambiente, etc., etc., y tambe gobierno a dicidi pa keda pone placa disponibel den Serlimar.
Cu cambio di gobierno e desangramento di Serlimar a bolbe mira luz di dia.

E prioridad di e gobierno aki no ta pa alivia e peso di e pueblo Arubano, pero pa yena saco di mafiosonan cu ta financistanan y doño di AVP.
Y cos a cuminza preta, pasobra e deal cu Ecotech ta a punto di cay na filingrana, pasobra te cu awe no por manda ni un liter di gas pa WEB, y pa colmo den curso di siman pasa tabata tin un explosion den e planta aki cu lo nifica un otro tardanza.
Dicon a sconde esaki pa pueblo? Ta kiko a pasa cu tabata tin un explosion cu por a causa morto di hende? Ta presion ta ser poni cu trabounan malo ta ser haci? Unda e manipuladornan cu ta yama nan mes periodista, a keda??

E "machoman", aparte cu e ta un minister cu ta hiba un maneho corupto y anti-Arubiano, tambe ta sufri di un problema pisa cu su memoria.
Si Mike Eman ta sufri di "Grootheidswaanzin", e "machoman" aki ta sufri di e malesa cu den boca di pueblo ta mihor conoci como "perde haña", pasobra e ta lubida kiko tur a ser bisa den pasado.

Contrario na loke e "machoman" aki ta rogando, ami TAMPOCO lo paga (btw ami ta un di esnan cu NO a paga), y si nan nenga di recohe sushi, mi tambe lo bisa ban benta e desperdicio den cura di e "machoman" aki.

Y aki no ta cuestion cu no ta dispuesto pa paga, pero si NO tin placa pa Nos Grandinan, NO tin placa pa nos Hendenan Special, NO tin placa pa Educacion, NO tin placa pa AZV, y awor NO tin placa pa Serlimar tampoco, etc., etc, pero SÍ tin placa pa Green Conference, SÍ tin placa pa biaha rond di mundo, SÍ tin placa pa mafiosonan di Miami y Bogota y Portugal pa Green Corridor, tambe SÍ tin placa pa paga e director "handpicked" un aumento di 4000 bubu cu un backpay desde januari, SÍ tin placa pa nombramento di hendenan di pafo sin pasa departamento di Human Resources y sin cu tin vacatura, etc., etc, anto lo NO tin placa pa sigui hinca den saco di e mafiosonan aki tampoco.

Y pa colmo e malesa di "perde haña" no a strobe di ta un hipocrita tambe, pasobra di un banda ta yora pa pueblo paga Serlimar, y ora cu Serlimar por gana un poco placa cu bakinan cu nan tambe ta huur, ata ta Ecotech ta huur baki den e proyecto di Green-Corridor. Wak e pruebanan adhunto.
Pues pueblo Arubano mester manda un mensahe cla pa e "machoman" aki:
"BAI COBRA BO AMIGONAN Y SOCIONAN MAFIOSO PROME".
ARUBA Y ARUBIANO, QUO VADIS!


Den nomber di Union Patriotico Progresista – U.P.P.
Candelario A. S. D. Wever
Brazil, augustus 3, 2015

Anexo: 3 potret di bakinan di Ecotec