Inauguracion di Zoutmanstraat 1 y apertura di Cosecha 

Dialuna atardi Minister Otmar Oduber hunto cu miembro di CRAFT y un artesano local tabatin e placer di realiza e inauguracion oficial di Zoutmanstraat 1. Despues di a pasa den e proceso di renovacion, e edificio awor lo ta enfoca riba nos herencia cultural.  Esaki pa varios motibo manera e hecho cu Zoutmanstraat 1 ta un monumento y ta riba su mes un herencia tangibel di nos. Na mes momento cu a inaugura e monumento a haci apertura di e galeria di artesanonan local yama Cosecha. Aki productonan cu SEYO di Aruba di nos artistanan local ta disponibel aki. E edificio ta brinda espacio tambe pa Unesco. Unesco ta e instancia cu ta enfoca entre otro riba desaroyo cultural y ta conduci por ehempel investigacionnan riba nos herencia intangibel. Cultura, arte y artesania ubica den un solo edificio monumental.

Cu e inauguracion di Zoutmanstraat 1 y apertura oficial di Cosecha, ta marca e culminacion di esfuersonan grandi di entre otro e propio artesanonan local, Ministerio di Cultura, Departamento di Cultura, cu colaboracion di Ministerio di Infrastructura y cu sosten di APA.

Cosecha lo tin un surtido enorme di artesania, manera ta joyas, cuadranan, arte traha di driftwood, koper, di materialnan recicla y tambe cadenanan traha di glas. Tur articulo den e galeria tin un seyo di made in Aruba. E artesanonan a pasa den un proceso na DCA hayando nan derecho di SEYO y pa forma parti di e Galeria Cosecha. Dentro di poco lo tin un espacio pa tayernan cu fundacion C.R.A.F.T. lo kier habri na San Nicolas, unda e artesanonan cu no tin un area adecua pa por traha lo por tin un area di trabou, unda publico lo por cera conoci cu nan y cu nan manera di traha. Mientrastanto tur e productonan aki ta disponibel y na benta den Cosecha.

Durante e apertura tur presente a ricibi un glas cu champagne pa brinda hunto na momento cu Minister Oduber, miembro di CRAFT y artesano a corta cinta na e galeria di Cosecha. Cu esaki a culmina e acto oficial brindando pa e apertura di Cosecha y inauguracion di Zoutmanstraat 1.

Expresionnan haci den e articulo aki no necesariamente ta refleha opinion di ArenaPoliti.co