MI TA LAMENTA E DESTRUCCION, Y MI TA DI CONDENA CU PRESIDENTE DI PARLAMENTO NO A DUNA OIDO NA SINDICATONAN 

ORANJESTAD – Lider di MEP Evelyn Wever-Croes a duna su prome reaccion despues di e reunion di diahuebs ultimo, den cual gobierno di Mike Eman a regala autonomia di nos pais.
“Pueblo a demostra cu e ta harta caba di Gabinete Mike Eman y tanto medida. Pueblo a demostra cu ya e no tin confiansa mas den e palabranan di Mike Eman, cu awor a pone cu nos a perde nos autonomia. Miles di persona a lanta di mainta trempan pa bin scucha e reunion na Parlamento, y apesar di a wordo insulta pa e coordinadornan di Mike Eman, a keda pa sigi e reunion.
Sindicatonan desde mainta trempan a pidi Presidente di Parlamento un audiencia pa wordo scucha ya cu gobierno no ta scucha nan mas. Presidente di Parlamento henter dia a tene sindicatonan na linia, ganjando nan cu e lo atende cu nan. Presidente di Parlamento a schors e reunion cantidad di biaha, pero ningun momento a scucha e sindicatonan, y esey a pone e situacion escala. Polis a purba intermedia, sin embargo e actitud arogante di e presidente di parlamento a pone cu mas cerca e momento di votacion tabata yegando, mas e presion di manifestantenan a aumenta, pasobra nan a realisa cu presidente di parlamento a ganja nan. Y segun mi a wordo informa pa Cuerpo Policial, despues cu reunion a caba, na momento cu presidente di parlamento a bisa sindicatonan cu e ora e lo scucha nan, cosnan a sali for di man, cu tur e consequencianan desastroso cu nos ta mira awe.
Mi ta lamenta profundamente cu esaki a tuma lugar, ami ta un persona cu ta contra violencia y pesey mi ta purba evita violencia mas tanto posible. Ta un dolor pa mira e danjo ocasiona na e cas di pueblo, pero mas dolor ta hasimi di sa e motibo di e danjo hasi: ora pueblo no ta wordo scucha den su propio cas, actonan di desesperacion por condusi na esakinan.
Y den esaki tin un responsabel: e presidente di parlamento cu por a evita tur esaki door di simplemente scucha e sindicatonan. Mi a pidie cantidad di biaha durante reunion pa siquiera scucha nan 30 minuut. Mi a hasi tur lo posible pa evita cu cosnan ta bai for di man. Mi a bisa e presidente di parlamento, cu si Mike Eman y gobierno bira lomba pa pueblo, Parlamento no por hasi mescos. No un biaha, sino varios biaha. Lamentablemente awe nos tur por mira e consequencia.
Ta importante pa tene cuenta cu pueblo ta rabia, sindicatonan ta rabia, gremionan ta rabia. Mike Eman no tin nan sosten mas, Mike Eman tin sosten di 13 parlamentario, 700 coordinador y algun persona cu ta pertense na e nucleo di partido AVP. Na momento cu un lider di un pais no tin e sosten mas, y riba dje presidente di parlamento ta sera porta di parlamento pa pueblo, cosnan lo sali for di man. Esey a pasa den pasado caba, esey a pasa diahuebs y esey lo pasa den futuro tambe si Parlamento no kier scucha su pueblo. No culpa ami ora esey pasa, culpa boso mes cu a bira arogante y no kier scucha pueblo mas.
Mi kier pidi tur hende pa tene calmo, pasobra violencia no ta soluciona e problema cu nos ta aden. Violencia a causa destruccion y tin hopi persona cu ainda ta deteni, pasobra nan a lucha pa nos libertad. Ohala cu e sucedidonan di diahuebs ultimo sirbi pa Mike Eman por sinta y pensa bon ta kiko e ta hasiendo cu e pueblo aki. Pueblo a demostra cu e ta harta caba di Gabinete Mike Eman, e pregunta ta, kiko Mike Eman ta bai hasi awor?” palabranan di lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co