Diahuebs 27 augustus 2015 ta drenta historia di nos pais como un dia scur, pasobra ta e fecha cu Mike Eman y su 13 parlamentarionan a entrega autonomia di nos pais. Pa tur hende realisa e grado di dictadura den nos pais, mester constata cu Parlamento a hunga e wega cu Mike Eman y a censura e reunion. E reunion apenas a pasa un rato na radio, na television e no por a pasa mes, y via website no tin nada graba pa futuro generacionnan por mira e entrega pa e traidornan di AVP.
Parlamentarionan di oposicion a pidi presidente di parlamento varios biaha pa coregi esaki, pero e presidente prome a ganja riba Setar, y despues no tabata sa mas kiko pa ganja. Setar a informa nos mientras tanto cu nan no tabata tin ningun storing. Parlamento a hinca miyones di florin den automatisacion y den canal di parlamento, despues a kita e unico persona cu por a traha cu e sistema, for di trabou, y awor por manipula cu censura ki ora cu ta.
Parlamento a faya. Miles y miles di hende kier a sigi e reunion, kier a scucha ki argumento Mike Eman tin pa a entrega nos autonomia, pa scucha e parlamentarionan defende dicon nos mes no por regla nos asuntonan financiero sin mester bai entrega autoridad na Hulanda.
Parlamento a hunga wega cu Gobierno pa sigi malinforma pueblo di Aruba. Dictadura di Mike Eman awor a drenta Parlamento bek!

Expresionnan haci den e articulo aki no necesariamente ta refleha opinion di ArenaPoliti.co