Siman pasa parlamento a trata y aproba e ley di supervision financiero CAFT . E ley di supervision a nace despues cu Gabinete Eman a firma un protocol dia 2 mei pero prome cu esei ja nos por a papia di supervision riba presupuesto 2014 ora cu "e hemchi a pasa over"  y a conduci na un KB. Ta importante pa enfatisa cu e motibo principal tawata ondeugdelijk financieel beheer dus mal maneho financiero. Pero semper ta relevante pa puntra dicon cosnan a yega asina leu? Acaso no por a evita un ley CAFT? 

Na promer lugar e ta importante pa pueblo compronde cu e ta necesario pabo pais tin un finansas publico sano esta un debe nacional y un desaroyo presupuestario sostenibel. Nos pais ta chikito y tin un economia fragil cu na e momento aki ta depende di un solo sector cual ta pone cu mas ainda nos mester percura cu maneho di nos debe ta algo cu nos lo por paga bek y fiha prioridadnan ora cu pais Aruba ta compila su presupuesto. IMF den pasado a indica cu pa nos un debe sostenibel lo ta maximo 40%. Pa loke ta trata deficitnan esaki mester keda na lo minimo teniendo na cuenta cu si esakinan cada rato ta halto automaticamente ta conduci cu mester bai hasi prestamonan adicional pa tapa e buraco cual na e mesun momento ta crea gastonal adicional di interes cual na e momentonan aki ta e segundo categoria mas halto di gastonan ekivalente ta 17%.

Sigur un di e reglanan basico ta cu bo no por gasta mas di loke bo ta ricibi na entrada y inversionan mester tuma lugar na un forma responsabel nificando cu nan mester ta financieramente sostenibel. Den e periodo di gobernacion di Gabinete Eman I & II e desaroyo prespuestario tawata esun di mas malo den historia di pais Aruba. Malo den e sentido cu reglanan presupuestario no tawata wordo sigui y constantemente viola. Ademas di esaki ta importante pa enfatisa riba e hecho cu maneho di gasto di gobierno tawata desproporcional dus tawatin malgastamento di placa. E cifranan di e ultimo añanan ta papia pa nan mes ora cu serando 2014 nos averahe di deficit tawata 8.4%. Den placa esaki ta nifica cu tur aña un averahe di 346 miyon tawata wordo surpasa den nos presupuestonan! Kiko esaki ta bisabo? Wel 5 aña multiplica cu 346 miyon ta totalisa riba 1.7 biyon di debe sin conta aserca e gastonan di interes cu ta bin aserca riba esaki surpasando 2 biyon florin. Consecuencia di esaki ta un debe nacional cu ta batiendo record y conforme e ultimo presupuesto 2015 e ta 81.7%! 

Un parlamento incapas
Banda di e hecho cu nunca pais Aruba a conoce un gobierno asina iresponsabel y deficiente den su maneho nos no mester lubida ta ken a dune espacio pe hasi y deshasi. Lamentablemente parlamento cu ta esun cu ta suppose di cuestiona maneho y sali na vanguardia di pueblo a duna Gabinete Eman un "free ride" pa derocha placa! Durante 6 aña no tawatin ni 1 solo parlamentario cu por a para e trein rumbo destruccion di nos pais! Pero laga si ta pa aproba beneficionan propio esaki lo a sosode den solamente 6 minuut bou un silencio y scondi pa pueblo!! Pa awor pueblo mester realisa caba cu loke Aruba di berdad mester ta un parlamento critico cu por marca un liña straight y para cabai di gobierno ora cu tin cosnan iregular, desproporcional y contra bienestar di pueblo. Den e caso aki ta di lamenta cu fraccion AVP sosteniendo gobierno a demostra tur e añanan aki cu ta danki na Incapacidad di parlamento pa eherce su trabou di controla a laga CAFT hasi su entrada na Aruba!

Expresionnan haci den e articulo aki no necesariamente ta refleha opinion di ArenaPoliti.co