Den nos ultimo comunicado prome cu tratamento di CAft den Parlamento dia 27 di augustus ultimo, nos a anticipa caba kico lo bay ta e resultado di e reunion aki. Esta cu Parlamento lo bay di acuerdo pa voluntariamente, por medio di un simpel ley, entrega su propio autoridad y derecho di budget, manera cu Gobierno di Aruba a conveni cu Hulanda den e protocol di 2 di mei e aña aki.
Na mes momento e resultado di e reunion aki, pa UPP ta muestra cu e entregamento di nos autonomia di Staten y esun financiero di pais Aruba, nifica cu despues di 30 aña nos a demostra di no ta merecedor di e Status Aparte, cu nos Pueblo a lucha p’e bou guia di en feliz memoria Betico Croes.
Aruba despues di 30 aña a demostra cu nos no por carga nos mesun responsabilidad, y pa motibonan narcista y razonnan partidista ta prefera di duna Gobierno Hulandes un poder cu antes, prome cu autonomia di Antiyas y despues di Aruba, nan tabata tin.
Y manera nos a anticipa, a resulta tambe, ora cu Prome Minister den Parlamento durante di e tratamento a bisa, cu e ley di CAft aki ta nos ta pidi’e voluntariamente, y ta algo temporal. Pues segun e, nos no mester ni di un KB, ni di un AMvRB, of un rijkswet, al estilo Corsou.
Cu esaki tambe ta keda demostra, cu Mike Eman - despues cu aña pasa a bay den un huelga di hamber y a grita cu hamas lo entrega un millimeter di nos autonomia - ta scohe pa su mesun bienestar, su mesun imagen y su popularidad.
Aki ta unda nos tin di corda riba e carta di Juan David Yrausquin, cu a adverti Mike Eman pa wak pa e carga su responsabilidad y tuma e medidanan necesario, pero cu mester salbaguardia e autonomia cu nos grandinan a lucha p’e. El a mustra Mike Eman cu ta tempo pa e scohe entre esaki, of riba un popularidad cortico, pero perdiendo e autonomia aki, pa futuro generacionnan.
Cu pasamento di Ley di CAft aki, claramente Mike Eman a scohe pa sigui e caminda di popularidad envez di responsabilidad. Y claramente nos por wak esaki den tur e formanan cu a bin ta defende e postura y voto di diahuebs ultimo pa e 13 parlamentarionan di AVP.

UPP ta keda preocupa tambe cu henter e asunto di e rol di Parlamento.
Definitivamente nos ta kere cu un epoca ta tras di lomba, 30 aña di un sistema politico y democracia parlamentario cu a bira obsoleto y no ta funciona mas. Practicamente ta un sistema pa sirbi e oligarkia local, mientras cu poco poco nos pueblo ta esun cu ta sufri. Un sistema di representacion cu hustamente a hinca nos den e rumbo di e abismo total cu nos ta bayendo.
Tambe nos por mira cu nos supuesto organo mas halto di nos constitucion, ta na merced di gobierno, y ta baila segun cu gobierno of lider di e gobierno ta toca.
E hustificacionnan cu nos ta tende, ta esunnan di mas ridiculo cu por tin, y ta un bofta den cara di inteligencia di nos Pueblo. Ora cu hustamente un presidente di Parlamento ta duna di conoce cu awor, cu introduccion di CAft pa Aruba, Pueblo di Aruba lo tin transparencia di cifranan.

Kico esaki tin di bisa di nos Parlamento? Kico ta e refleho cu un Parlamentario asina ta duna? Cu - mientras ta un derecho fundamental pa nos Pueblo tin e informacionnan corecto y transparente pa e tambe por eherce control riba su gobernantenan - e organo mas importante cu mester controla Parlamento, ta adimiti cu nan mester di un CAft pa Pueblo por haya e cifranan aki.
Kico ta e rol e ora di un Parlamento asina? Ki balor Pueblo por duna un representante di Pueblo cu no por exigi cifranan corecto? Mas ainda exigi e transparencia necesario di gobernacion, mirando e tantisimo proyectonan cu tin hopi duda riba nan. Mientras cu Marisol Tromp a tuma un postura basta critico algun luna pasa ora di tratamento di presupuesto 2015, parce cu e insulto di Baba Herde den su direccion, toch a haci efecto riba dje. Of kizas tin otro asuntonan mas tras di esaki?
Tambe ta tristo e rol di un otro Parlamentario, sali di cuna di e libertador Betico Croes, y cu na 2010 na un forma hopi skerpi a juist hustifica cu como Parlamentario bo ta sirbi interes general y cu bo tin di scucha pueblo.
E mesun Parlamentario aki, na mei di aña aki ainda tabata hopi critico riba e protocol di 2 di mei. Y awe nos por mira, cu juist e ta wordo uza dor di AVP, pa presenta algun amienda riba e ley, pa asina e por hustifica pakico e ta voor pa bin cu un ley asina.
Mervin Ras sigur mester percura pa no uza e nomber di e gran estadista Arubano, lider di Pueblo aki, cu a percura pa Mervin Ras por a biba den un pais autonomo pa 30 aña largo. Y como academico Mervin Ras a decepciona, ora ta bin haci un cambio den e ley, unda ta agrega e palabra “tijdelijk” (temporal). Pero no tin splicacion cuanto tempo e temporal ey ta. Pues un berguensa total.

Loke nos por a observa tambe, ta cu e grand orador di semper, esun di retorica, cu ta viaha rond mundo pa tene su speechnan, durante e reunion aki su discursonan tabata masha cortico, tanto den prome como segundo tanda. Unda cu su persona a haya ta bon, en bes di duna splicacion kico e ley ta bay nifica, a bay den pasado y hustifica cu esakinan ta instrumentonan pa evita cu den futuro otro gobierno por bay abusa di nos finanzas publico.
Manera semper Mike Eman parce di no ta biba na Aruba. Parce di kier sigui engaña e pueblo aki.

E reunion aki y particularmente e reaccionnan cu a bin despues pa defende un causa perdi, sigur lo por tene nos mas dianan ocupa cu analisisnan.
E realidad ta cu UPP ta kere cu henter Parlamento a faya.
Nos a mustra caba cu ya caba desde 2 mei 2015, ora e protocol tabata conoci, particularmente e oposicion representa den Parlamento mester a haci su trabou. Mas di 3 luna a laga pasa, pa den e ultimo siman, e ultimo dia, trata na para e ley aki.
Apesar cu e oposicion so den Parlamento lo no por a tuma e decisionnan pa para e ley aki, UPP ta kere cu mester a bin cu un mobilisacion mas tempran.
P’esey tambe UPP ta kere, cu e proceso na momentonan cu a start caba desde 2 di mei 2015 y cu a culmina dia 27 di augustus den Parlamento, ta un proceso normal di un ley, apesar e ta afecta nos autonomia, cu Gobernador no por para mas. Gobernador como representante di Rey, defacto lo mester bay contra di e protocol cu Gobierno Hulandes a firma, si e nenga di firma.
UPP ta kere cu tin otro camindanan pa yega Roma, pero esey ta exigi determinacion di e mundo politico aki na Aruba, pa por demostra Hulanda cu e protocol y e ley di CAft no tabata e alternativa. Y cu tin otro alternativa cu nos por traha na dje.
Aruba y Arubianonan, Quo Vadis??

Den nomber di Union Patriotico Progresista – U.P.P.
Candelario A. S. D. Wever
Brazil, september 2, 2015

Expresionnan haci den e articulo aki no necesariamente ta refleha opinion di ArenaPoliti.co