Si bo mira con Mike Eman y Marisol Lopez-Tromp a prepara, organisa pa bodyguardnan, polis, CEA, coordinadornan, hendenan arma tur caminda, camara paden y pafor di Parlamento y 12 hende cu ta monitor e camaranan aki, anto bo mes sa pakico y con tur cos a bay dia 27 di augustus ultimo. E practica aki a ser haci caba na 2 ocasion cu pueblo a bin pa protesta, unda Dowers hunto cu Mike ta usa practica di bati pueblo, suta nan cu klop, basha tiro pa spanta nan, graba nan, warda hende paden y pafor di Parlamento pa tira palabra y provoca e manifestantenan cualnan a ser prepara pa mentenan maligno y diabolico.

Provocacion y menasa
Riba e dia di traicion contra nos Status Aparte, esta 27 augustus ultimo, nan a pone yen di coordinador cu ta cobra sin traha for di tempran blokia entrada di e tribuna pa laga nan hendenan so drenta y laga nan siguridad stroba cualkier hende di MEP cu sali y pa no lag’e drenta bek. Abusa cu palabra fresco di nos hendenan. Laga nan hendenan cana rond den gang busca problema cu nan provocacion y menasa. Algo nunca bisto ta cu yen di polis den sala di Parlamento tabata presente pa cuida e cobarde y traidornan di AVP, anto for di eyden ta coordina pa e desgraciadonan abusa parti pafor. Tambe a pone spionnan ta cana vigila hende.

Protesta y welga
Mike Eman y Dowers ta lubida nan pasado con nan tabata orquestra fechoria cu cierto sindicatonan, unda nan tabata palabra pa fomenta hopi desorden. Durante mi añanan den politica como Ministro Presidente mi a soporta hopi menasa, intimidacion di hendenan cu Henny y Mike Eman tabata manda. Cuanto di mi propiedadnan a ricibi daño etc. Cuanto abuso y groseria boso y boso hendenan a haci y a comete durante varios protesta y welga, entre otro trata di kima Bestuurskantoor, kibra baricada, kibra porta y bentana di Bestuurskantoor, blokia caya cu trekker, tira cu arma di candela, cera Aeropuerto, kibra y drenta Parlamento etc. Nunca mi a usa Riot Comando pa suta, bati, abusa cu klop contra e manifestantenan.  Awe ta boso kier hunga señorita den cas di prostituta, manera cu nos no sa ken boso ta y kico boso tabata haci.

Un gobierno ilegitimo
Awor cu pueblo a bira lomba pa boso, boso no tin legitimidad pa sigui goberna mas, boso no ta deseo di pueblo mas. No obstante 13 traidor den Parlamento, boso ta uzando tacticanan fascista pa intimida y persigui contrincantenan pa boso por keda na poder y sigui abusa. Boso kier mata y asesina derechonan di un pueblo disgusta y fada. Ken no sa con boso ta graba tur hende, boso team di Riot Comando cu cacho? Mester publica nomber di tur esnan rond di boso cu ta abusa pa pueblo sa ken ta ken y pa tribunal di pueblo mes traha cu nan. Stop di oprimi y asesina caracter di un pueblo luchado.
Dia 27 di augustus ultimo Mike Eman y AVP a caba di mata e libertad pa protesta, manifesta, welga etc. Pueblo mester sa cu Mike Eman ta graba tur cos pa su cobardia. No kere si cu pueblo a bay drumi, anto laga boso sigui atrapa nos derechonan. Y pa no lubida cu sero cu sero no ta topa, pero yiu di mama cu yiu di mama si!

Expresionnan haci den e articulo aki no necesariamente ta refleha opinion di ArenaPoliti.co