MEP: Medida #1 di CAFT. 30 mil cobransa di grondbelasting y erfpacht a wordo entrega.
Ta parce cu pueblo no ta haya ni un chens di hala rosea cu ya e siguiente cuenta di belasting ta bati na porta. Sino ta ricibi cobransanan halto di inkomstenbelasting halto awor ta ricibiendo cuentanan di grondbelasting y erfpacht! Den e ultimo dianan al rededor di 30 mil cobransa a wordo reparti.
Loke ta di cuestiona y condena ta e hecho cu cierto cobransanan ta wordo ahusta sin cu necesariamente tin base. Of kizas e ta concientemente hasi pasobra Gabinete Eman ta desespera pa haya placa? Un cos ta sigur cu varios cobransa no ta nan lugar y pueblo mester ta conciente cu e por hasi uso di su derecho pa entrega un bezwaar.
Ademas e ta incomprendibel cu ta manda cobra belasting y erfpacht mientras cu mayoria cuidadano ni a ricibinan placa di belasting bek di aña 2010! Den e reforma fiscal na caminda na 2016 probablemente grondbelasting lo bai wordo atrobe! Por mira claramente cu e deseperacion di Gabinete Eman pa suta pueblo cu medida a bira mucho mas grandi, awor cu e ley di CAFT a drenta na vigor. Apenas e inkt riba e ley ey ta seco, ya nan a manda cobra pa parkeermeter den caya, cu pa colmo ta bai den un compania cu ta den man di e campanjadornan di Otmar Oduber. Apenas e inkt di e ley di CAFT ta seco, awor nan ta manda al rededor di 30 mil cobransa di grondbelasting y erfpacht y ta dunabo masha poco tempo pa bo paga!
Ta con ainda tin politico di AVP kier pa bo kere cu CAFT no a trese medida? Si desde cu CAFT a bira ley ta yobe medidanan ta yobe!
Akinan un biaha mas Gabinete Eman ta wak su propio interesnan y ta opta un biaha mas pa castiga pueblo!
Expresionnan haci den e articulo aki no necesariamente ta refleha opinion di ArenaPoliti.co