ORANJESTAD – Lider di MEP a wordo acerca pa prensa cu un reaccion riba e inciativa di minister president Eman pa un yamada di paz.

“Paz ta den bo actonan, no den palabranan so. Mike Eman desde diahuebs ta cherchando di e dolor di nos pueblo. Eman kier pa bo enfoca riba e glasnan kibra so, y pa bo no pensa riba e dolor cu a wordo causa na nos pueblo. E dolor di mester a entrega nos autonomia pa via di un gobernacion iresponsabel. E dolor di tur e medidanan cu mester a wordo tuma contra nos pueblo. E dolor y ansha di tur e medidanan cu mester bin ainda. E dolor ey e gran mayoria di nos pueblo ta sinti, y no algun glas kibra. E dolor cu parlamento tambe a bira lomba pa pueblo, y no kier a scucha sindicatonan.

Eman a mustra cu show y manipulacion ta mas importante. El’a scohe pa bai verf en bes di traha pa saca nos pueblo di su sufrimento. El’a scohe pa canta mariachi, come bolo y balia man ten’i dilanti Parlamento, en bes di purba scapa nos pais. Nan a balia ‘ban ban pas’un rondo’, manera mucha chikito, cherchando asina di pueblo.

Tur esaki no ta crea PAZ. Tur esaki ta crea mas RABIA, mas ODIO, y Mike Eman ta fomentando GUERA. Paz bo ta logra door di ta honesto. Un virtud grandi y pa hopi di nos algo dimes, pero pa Mike Eman un virtud cu e no conoce. Pa Mike Eman manipulacion ta bin prome cu tur cos, te hasta prome cu Dios. Pasobra ora el’a realisa cu no ta hopi hende a acudi na su yamado, el’a laga manipula potretnan di e evento, cu photoshop por cierto hopi mal hasi, den cual bo ta mira con nan a cambia e potret y hasi manera cos tabata tin hopi mas hende y hopi mas bandera. Tur hende sa cu ta un senjora so a bai cu su bandera, y por cierto bisti cu un tshirt di MEP. Diripiente Mike Eman ta manda potretnan prensa manipula, cu ta mustra mas di un bandera, den un intento pa ganja atrobe cu a bai hopi hende.

Pero nada no ta pasa pa malo, te hasta e acto di desesperacion aki tin su parti positivo: mas hende a realisa cu Mike Eman no tin sosten mas. E no tin sosten di gremionan, e no tin sosten di sindicatonan y e no tin sosten di pueblo mas. Riba su mes, mi ta sostene tur yamada na paz, sinembargo, e mester ta sincero si. No hunga cu religion, no hunga cu Dios, no hunga cu pastor, mientras bo unico meta ta manipula hende. No lubida nunca cu tin un Dios ey riba y E ta wak tur cos”, lider di MEP Evelyn Wever-Croes a finalisa

Expresionnan haci den e articulo aki no necesariamente ta refleha opinion di ArenaPoliti.co